Войти

Войти

Бүгүн, ахсынньы 19 күнүгэр 12.00 чаастан (Москуба бириэмэтинэн) дойду бэрэсидьиэнэ Владимир Путин суруналыыстары кытта көрсүөҕэ. Бу номнуо 15-с пресс-конференцията буолар. Бастакы көрсүһүү 2001 сыллаахха ыытыллыбыта.

Владимир Путин пресс-сэкирэтээрэ Дмитрий Песков иһитиннэрбитинэн, бэрэсидьиэн миниистирдэри, вице-премьердэри, федеральнай ааҕыныстыбалар салайааччыларын кытта көрсөн эрдэттэн бэлэмнэнэр эбит.

Быйыл хаһааҥҥытааҕар да элбэх 1895 суруналыыс аккредитацияламмыт. Былырыын 1702 суруналыыс кыттыыны ылбыт. Ордук элбэх суруналыыстар эрэгийиэннэртэн кэлэллэр. Ону таһынан, тас дойдулартан эмиэ кыттыыны ылаллар.

2001 сыллаахха бастакы пресс-конференцияҕа 500 тахса суруналыыс кыттыыны ылбыт. Оттон 2002-2003 сылларга 700, 2008 сыллаахха – 1364. 2001 сыллаахха көрсүһүү 1 чаас 35 мүн буолбут. Оттон 2008 сыллаахха саамай уһуннук 4 чаас 40 мүн устата ыытыллыбыт.

Кэлиҥҥи сылларга пресс-конференция сылы түмүктээн ахсынньы ыйга ыытыллар буолла. Бэрэсидьиэн суруналыыстар ыйытыктарын хааччахтаабат. Онон ханнык баҕар тиэмэҕэ ыйытыахха сөп. Ордук эрэгийиэнтэн кэлбит суруналыыстары истэ сатыыр. Пресс-сэкирэтээрэ бэлиэтииринэн, маннык курдук улахан хабааннаах пресс-конференцияны  аан дойду үрдүнэн аҕыйах салайааччы ыытар.

Владимир Путин суруналыыстары кытта көрсүһүүтүн “Россия 1”, “Россия 24” уонна “Первый канал” ханаалларга аһаҕас эфиргэ көрүөххүтүн эбэтэр “Маяк”, “Вести ФМ” уонна “Радио России” араадьыйаларынан истиэххитин сөп.

news.ykt.ru/

Тарҕат:

Добавить комментарий