Саха сирин биир кырдьаҕас куоратын 385 сыллааҕы үбүлүөйүнэн космос аан дойдутааҕы станциятыгар сылдьыбыт былааҕын улуус дьаһалтатын баһылыга Сергей Винокуров П.Х.Староватов аатынан Бүлүүтээҕи кыраайы үөрэтэр түмэл дириэктэригэр Татьяна Афанасьеваҕа туттарда. Сайыҥҥы лааҕырдар иитиллээччилэрэ бэлиэ түгэн туоһуларынан буоллулар.
От ыйын 8 күнэ Бүлүү куоратын оскуолаларын сайыҥҥы лааҕырдарын оҕолоругар умнуллубат өйдөбүлү бэлэхтээтэ. Оҕолор бу күн кыраайы үөрэтэр түмэл экспонаттарын, ол иһигэр космонавтар ваакумнай аһылыктара, космоска тахсар скафандр, туттар тэриллэрэ, “Восточнай” космодромтан көппүт бастакы аракыата Үгүлээт сиригэр түспүт бааҕын сорҕото туруоруллубут быыстапкатын үөрэ-көтө билистилэр, космоска сылдьыбыт куорат былааҕын кыраайы үөрэтэр түмэлгэ туттарыы үөрүүлээх тэрээһинигэр быһаччы кытыннылар.
Култуура управлениетыттан Надежда Иванова космос куйаарыгар Бүлүү куоратыттан араас символ тахса сылдьыбытын, ол курдук, тимир ууһа Реворий Чемчоев хомуһа күөх планетаны 190 хонук эргийбитин, космонавт Олег Кононенко космостан хомус тыаһын иһитиннэрбитин, куорат 380 сыллаах үбүлүөйүгэр Маша Куланова тикпит куорат гербэтэ, саха бастакы идэтийбит композитора Марк Жирков мэтириэтэ космоска тахса сылдьыбыттарын оҕолорго кэпсээтэ.
Бүлүү куорат 385 сыллаах үбүлүөйүгэр куорат былааҕа космос аан дойдутааҕы станциятыгар кулун тутар 24 күнүттэн бэс ыйын 28 күнүгэр диэри түөрт ый устата көтүһэ сырытта.
Улуус Роскосмоһы кытта быһаччы сибээһи тутуһарынан Бүлүү куорат символлара космос куйаарыгар тахсалларын, билигин Роскосмос көмөтүнэн Бауман аат. техническэй академияҕа икки оҕо үөрэнэрин улуус дьаһалтатын баһылыга Сергей Винокуров кэпсээтэ. Кини космонавтар Олег Кононенко, Алексей Овчинин, американец Энн Маклейнилии баттаабыт, МКС бэчээтэ туруоруллубут куорат былааҕын кыраайы үөрэтэр түмэл дириэктэригэр Татьяна Афанасьеваҕа туттарда.
Космонавт Алексей Овчинин быйылгы ыһыах кэмигэр видеонан улуус олохтоохторун, ыалдьыттары истиҥник эҕэрдэлээн турардаах. Ыһыах бастакы күнүгэр Бүлүү куората 385 сыллаах үбүлүөйүнэн Роскосмос госкорпорация бэлэхтээбит «Союз Т-12» аракыата макетын “Оленскай” стадион таһыгар космонавт-лүөччүк, ССРС Геройа Анатолий Арцыбарскай кыттыылаах үөрүүлээх арыллыы тэриллибитэ.
Ити курдук, Бүлүү куорат космос куйаарыгар сылдьыбыт былааҕа Бүлүүтээҕи кыраайы үөрэтэр түмэл космонавтика стендэтигэр биир сэдэх экспонат буолан дьон көрүүтүгэр туруо.
Николай КУПРИЯНОВ, ulus.media
