Бэрэстэбиитэллээх уорган дьокутааттарын, улуус, нэһилиэк баһылыктарын балаҕан ыйын 8 күнүгэр, биир кэлим куоластааһын күнүгэр талыахтара. Быыбардар 57 муниципальнай тэриллиигэ ыытыллыахтара. Бу туһунан Киин быыбардыыр хамыыһыйа иһитиннэрэр.
“Бары учаастактааҕы быыбардыыр хамыыһыйалар быыбары ыытарга бэлэм олороллор. Уопсайа 800 учаастактааҕы хамыыүйа баарыттан, бу быыбардарга 150 учаастак үлэлиэҕэ”, - диир ЦИК бэрэссэдээтэлин солбуйааччы Александр Власов.
Балаҕан ыйын 8 күнүгэр Аллайыаха, Өлүөхүмэ, Аллараа Халыма улуустарыгар уонна Жатай бөһүөлэгэр саҥа улуус баһылыктарын талыахтара. Оттон болдьох иннинээҕи нэһилиэк баһылыктарын талыы Булуҥҥа, Намҥа, Ньурбаҕа, Орто Халымаҕа уонна Уус Майдаҕа ыытыллыахтара.
Күн бүгүн 117,5 тыһ. быыбардааччы бэлиэтэммит, ити өрөспүүбүлүкэ быыбардааччытыттан 18,3%.
Уопсайа өрөспүүбүлүкэ олохтоохторо муниципальнай тэриллиилэр бэрэстэбиитэллээх уорганнарыгар 123 дьокутааты уонна 22 муниципальнай тэриллии баһылыктарын талыахтара. 42 муниципальнай тэриллиигэ нэһилиэк таһымнаах быыбардар ыытыллыахтара.
