Балаҕан ыйын 7-8 күннэригэр Мииринэй куорат ырыынагар дьон балачча тоҕуоруста. СӨ Тыатын хаhаайыстыбатын министиэристибэтин, “Ситим” медиа-бөлөх, Мииринэй оройуонун дьаһалтатын тэрийиилэринэн, “Профалмаз” уонна “Биир Ньыгыл Арассыыйа” баартыйа Саха сиринээҕи салаата өйөөннөр, “Алмаастаах күhүн-2019” диэн ас-үөл дьаарбаҥката ситиһиилээхтик ыытылынна.
Тэрээһин киирии түһүмэҕэр Мииринэй оройуонун дьаһалтатын тыа хаһаайыстыбаҕа салалтатын салайааччы Н.Пустоляков, “Профалмаз” профсойуус бэрэссэдээтэлин солбуйааччы К.Дегтярев, “Биир Ньыгыл Арассыыйа” баартыйа бэрэстэбиитэлэ Н.Белова тыл эттилэр. Ону таһынан, “Иэйии” ансаамбыл күһүҥҥү хомуурга аналлаах сахалыы тэбэнэттээх ырыатын бэлэхтээтэ.
Күһүҥҥү дьаарбаҥка сүрдээх өрө көтөҕүллүүлээхтик ааста. Бэйэтэ бырааһынньык курдук этэ. Сибиэһэй, бэйэ бородууксуйата – мэлдьи күндү. Мииринэй ырыынагар олохтоох оҕуруот аhын арааhын – хортуоппуйу, хаппыыстаны, оҕурсуну, помидоры, баклажаны, тыкваны, эриэппэни, эрэдиискэни, моркуобу, сүбүөкүлэни, биэрэстэри, укуруоптары, кииһилэни атыыга анаан дэлэччи тартылар. Маны сэргэ тэллэй, араас отон барыанньалара, тууһаммыт оҕурсу уо.д.а. атыыга бааллара. Бэл, бэйэ оҥоһуута пастила баара.
Маннык дэлэй атыыны-тутууну Мииринэй оҕуруотчуттара куруук байымнык, сиэдэрэйдик ыытааччылар. Бу хаартыскаларга Мииринэй курдук лиһир таас үүйүүлээх, лээби сирдээх куорат быыһыгар даачаларга, кэтэх уһаайбаларга үүннэриллибит оҕоруот астарын көрөҕүт. Манна үтүмэн сыра, элбэх үлэ ирдэнэр. Мииринэйдэр – туруу үлэһит дьон. Күнүс сүрүн үлэлэригэр, киэһэттэн түүн үөһүгэр диэри оҕуруоттарын бэрийэллэр. Атыылара да дьоһуннаах. Дьон олохтоох оҕуруотчуттартан бэркэ кэрэхсээн туран сүрдээҕин атыыласта. Бу да сырыыга Сунтаар улууһуттан кэлбит кыттааччылары бэлиэтиир оруннаах. Ол курдук, “Милк-Ас”( Түбэй-Дьаархан), “Хочо”(Тойбохой) тэрилтэлэр, Андрей Максимов бааһынай хаһаайыстыбата (Бүлүүчээн), урбаанньыт Семен Саввинов (Сунтаар с).
Сэмэн киилэтэ баара-суоҕа 500 солк сип-сибиэһэй убаһа этин аҕалан атыылаата, добуочча уочарат үөскүү сырытта. Харарҕаабыт мииринэйдэр сылгы бөдүргэйиттэн, амынньыар, арҕас, күөн куһуоктарын былдьаһа-тараһа атыыластылар. Кырдьыга даҕаны, чугас улуустартан эт кэлбэт эбээт. Ол иһин, дьон дьаарбаҥка кэлээтин кытары эккэ сүүрэр. Уопсайынан, атыылаһааччылар Сунтаар улууһун хаһаайыстыбаларын бородууксуйатын биһирии көрдө, хамаҕатык атыыласта.
Дьон тугу ордук сэргээтэ диир буоллахха, 500 солк арыыны, чөчөгөйү, сүөгэйи, иэдьэгэйи, суораты, йогурту. Мииринэйгэ киилэ арыы сыаната 1000 солк буола сылдьыбыта. Билигин да 800 солк чэпчэкигэ атыыламмат. Онон, дьон арыыны сөбүлээн ыллылар.
Бүлүүчээнтэн фермер Андрей Алексеевич Максимов оҕуруот арааһын аҕалбыт. Хортуоппуйа, сүбүөкүлэтэ, моркуоба бөдөҥнөрүн, астыктарын! Эдэр киһи оҕуруотун аһыгар атыылаһааччы тутатына хараҕын хатаата. “Аны хаһан кэлэҕин, куулунан ылыа этибит” диэччилэр бааллара. Андрей Максимов улууһун баһылыгар А.Григорьевка махтанар.
“Кириэстээх – Бүлүүчээн” 60 биэрэстэ усталаах айан суолун олоххо киллэртэрэн дьонун абыраата диир. Ол курдук, суол тутуллуоҕуттан Бүлүүчээнтэн Мииринэйгэ тыа хаһаайыстыбатын бородууксуйатын батара хаһыс да төгүлүн кэллэ.
Онон, өссө биир сэргэх тэрээһин дьону-сэргэни үөртэ, санааларын көтөхтө. Түгэнинэн туһанан, тэрийээччилэргэ, атыылааччыларга Мииринэй олохтоохторо барҕа махталбытын тириэрдэбит.
Станислав Алексеев, Мииринэй куората.
Ааптар хаартыскалара.
