АЛРОСА бөлөҕүн “Анаабыр алмаастара” хампаанньата ыраах сытар Анаабыр улууһун Үрүҥ Хайа уонна Өлөөн эбэҥки национальнай оройуон Дьэлиҥдэ сэлиэнньэтин олохтоохторун доруобуйатын туругун чинчийэр мэдиссиинэ көрүүтүн ыытарга көмөлөстө. Ол курдук, бу быраастар сырыыларын кэмигэр 598 киһи, ол иһигэр 138 оҕо, доруобуйатын туругун бэрэбиэркэлэтэр, ыарыытын быһаартарар кыахтанна. Дьэлиҥдэҕэ тиис туругун көрөр, эмтиир, сэрэтэр стоматология биригээдэтэ тиийэн, кинилэр өҥөлөрүнэн үөрэ-көтө 122 олохтоох туһанна.
Маннык, эмчиттэр биригээдэлэрин анаан-минээн, ыраах, эмчит тиийбэт, “узкай” исписэлиис суох, көстүбэт сиригэр илдьэн үлэлэтиини АЛРОСА хампаанньа 2018 сылтан саҕалаан, хас сыл аайы тэрийэр. Ол курдук, быйыл мобильнай биригээдэ састаабыгар “Өрөспүүбүлүкэ 1-кы нүөмэрдээх балыыһата – Мэдиссиинэ национальнай киинэ “ ГАУ уонна «Династия» ХЭУо киирсэн бара сырыттылар.
Арктика улуустарыгар ордук “узкай” дэнэр тус-туһунан суол ыарыылары көрөр исписэлиистэр тиийбэттэр. Ону учуоттаан, быйылгы көһө сылдьан үлэлиир эмчиттэр биригээдэлэригэр УЗИ бырааһа, кардиолог, педиатр уонна эндокринолог быраастар киирсэн, бара сырыттылар. Оттон стоматология биригээдэтигэр тиис бырааһын сэргэ, ортопед-техник, зуботехник уонна анал медсиэстэрэ киирбиттэр. Кырдьыга да, олус наадалаах исписэлиистэр.
«Мэдиссиинэ үлэһиттэрин көрүүтүн, бэрэбиэркэтин маннык тиһиктээхтик ыытыы түмүгэр Арктика улуустарын олохтоохторо мэдиссиинэ хаачыстыбалаах сүбэтин, өҥөтүн туһанар кыахтаналлар. Бу курдук стоматолог быраастар толору састаабынан тиийэн оҥорор өҥөтүнэн эдэр да, эмэн да дьон туһанара улахан суолталаах, көмөлөөх. Үгүстэр, төһө да баҕарбыттарын иһин, бу маннык мэдиссиинэ өҥөтүн туһанар инниттэн анаан-минээн Дьокуускайга сөмөлүөтүнэн көтөн кэлэр кыахтара суох, айан төлөбүрэ сыаналаах. Оттон маннык сырыы түмүгэр НЦМ медиктэрин көмөтүнэн сэлиэнньэ олохтоохторо бары эмчиттэргэ көрдөрүннүлэр. Ураты махтал тыллара стоматологтарга уонна зуботехниктэргэ ананар. Кинилэр бу сырыыга Дьэлиҥдэ 122 олохтооҕун көрөн-истэн бардылар. Биһиги социальнай партнердарбыт – АЛРОСА хампаанньаҕа уонна “Анаабыр алмаастара” тэрилтэҕэ – улаханнык махтанабыт”, – диэн этэр Өлөөн улууһун Дьэлиҥдэ национальнай нэһилиэк “Өлөөн эбэҥки национальнай оройуон” МР баһылыгын солбуйааччыта Маргарита Николаева.
Саха сирин муҥутуур кытыы сытар, хотугулуу-арҕаа туонатыгар түстэммит Үрүҥ Хайа бөһүөлэгэр эмчиттэр 131 киһини УЗИлаабыттар, эндокринологка 103 киһи көрдөрбүт. Кардиограмма оҥорбуттар, кардиологка 93 киһи көрдөрүммүт. Оттон педиатрга 48 оҕо сылдьыбыт.
«Хоту сиргэ мэдиссиинэ үлэһиттэриттэн турар мобильнай, дьоҕус биригээдэлэри тэрийэн ыытар олус сөптөөх, туһалаах быһаарыы. Киин сиргэ эмтэнэ барыы биһиэхэ олус ыарахан уонна улахан үбү эрэйэр. Маннык аахсыйа, сырыы ыраах ыстаадаҕа үлэлиир дьоммут доруобуйатын эмиэ көрдөрөр гына, уһун кэмҥэ буолара буоллар диэн баҕалаахпыт. Эмчиттэр көрүүлэрин түмүгэ невролог, оҕо стоматолога уонна да атын быраастарга наадыйыы баарын көрдөрдө. Бэйэм эмчиттэри кытта кэпсэтиибэр хас биирдии көрдөрүммүт дьоҥҥо тустаах эрэкэмэндээссийэ, эмтэнии кууруһа анаммытын эттилэр. Икки күн иһигэр 375 киһини көрбүттэр», – диэн Анаабыр улууһун Үрүҥ Хайа национальнай нэһилиэк баһылыгын солбуйааччы Егор Спиридонов кэпсээтэ.
Ыарыы буулуу илигинэ эрдэттэн профилактика тэрээһиннэрин ыытыы, тута эмтээн иһии – доруобуйа харыстабылын систиэмэтигэр дьоһун суолталаах. Онон маннык сырыы эбиллэн иһэригэр дьон баҕарар.
Бу туһунан “Анаабыр алмаастара” пресс-сулууспата суруйар.
