Израиль былаастара Газа секторга ХАМАС тэрилтэтин эһээри, 20 тыһ. киһилээх, элбэх байыаннай тиэхиньикэлээх сэриилэрин киллэрэ сылдьаллар. Сир анныгар сүүһүнэн биэрэстэ тоннель хаста сытар ХАМАС сэрииһиттэрин сааскы дьабарааскыны бултуур курдук уу кутан эбэтэр гааһы ыытан таһаартаары эбэтэр өлөртөөрү гынар.
Израиль былаастара кэлин билиммиттэринэн, кинилэр 2,3 мөл Газа олохтоохторун Египеккэ ыган таһааран, Хотугу Синайга олохсутар идэмэрдээх былааннаах эбиттэр. Ону өйүүргэ Эмиэрикэни кытта элбэх дойдулар (АХШ, Франция, Англия уо.д.а.) миротворецтарын киллэрэр былааннаахтарын кэпсииллэр. Миротворецтары палестинецтар төттөрү киирэ сатыылларын Египеккэ төттөрү үтэйиигэ туһаналлара буолуо. Оттон Газа сирин Израиль былдьаан ылан, бэйэтин сиринэн билиниэ. Ону бигэргэтэрдии, Эмиэрикэ бу күннэргэ бу регион судаарыстыбаларыгар суоһурҕанан, сөҕүмэр элбэх сэриилэрин, сөмөлүөттэрин, флотун ыыта олорор.
Израиль ХАМАС-тыын иирсээнэ аа-дьуо быт хаамыытынан, сороҕор уот ыһарыныы түргэтээн аан дойду үһүс сэриитигэр барыах айылаах. Ливан Хезболла байыаннай хамсааһына Израиллыын ытыалаһа олорор, Алтынньы 31 күнүгэр Йемен Израильга сэриини биллэрдэ. Байыаннайдара Израильга баар сыаллары баллистическай, кынаттаах ракеталарынан ытыалаатыбыт уонна дроннарынан атаакалаатыбыт дииллэр. Турция бэрэсидьиэнэ Эрдоган Израилы байыаннай бөрөстүүпүнньүк диэтэ. Иран Израилы Газаҕа сэриинэн киириэҥ да, сэрэн диирэ. Израиль Газаҕа киирдэ, оччотугар Иран эппит ьылын толорон сэриилэрин киллэрэр дуо? Сирия сиригэр Иран сэриилэрэ эмиэрикэ дьоннорун кытта сэрии бөҕө номнуо буоллулар.
Кытай дьиктитик дьаһаммыт. Онлайн хаарталарыттан Израилы суох гыммыт. Иордания, Египет, атын дойдулар бааллар, Израилы суоҕун курдук сотон кэбиспиттэр.
Египет “Израиль палестинецтары үтэйэн биһиэхэ киллэрбэтин” диэн буолуо, Газаны кытта кыраныыссалаһар сиригэр тааҥкаларын уонна куйахтаах сэриилэрин мунньар.
Балаһыанньа тыҥыыр, аан дойду болҕомтото Украинаны умнубут кэмигэр эмискэ ХАМАС бэрэстэбиитэллэрэ Израилы кытта охсуһууга сэрии сэбинэн хааччыйбытыгар уонна көмө оҥорбутугар Зеленскэйгэ махтаммыт видеоларын тарҕаппыттар. Кырдьык, элбэх ХАМАС аармыйатын көрдөрөр видеоларга арҕаа дойдулар Украинаҕа ыыппыт сэриилэрин сэбэ ыы-быччары. Ол иһин алтынньы 23 күнүгэр АХШ республиканецтарын баартыйата оборуона миниистирэ Ллойд Остинтан хайдах ити сэрии сэбэ ХАМАСКА тиийбитин силиэстийэлиирин ирдээбиттэр. Онон, баҕар сотору Украина көмөҕө ылбыт сэриитин сэбин атыылыыр хоруупсуйата биллэн, улахан айдаан буолар туруктаах.
Ол түмүгэр арҕаалар Украинаны сэрии сэбинэн хадаҕалыылларын тохтотон, анал дьайыылар эрдэ тохтуулларыгар тиэрдэрэ буоллар диэн күүтэбит.
Бэйэ кэр.
