Алтынньы 28-29 күннэригэр Дьокуускай куорат «Триумф» успуорт киинигэр САССР, РСФСР, СССР үтүөлээх тириэньэрэ Дмитрий Петрович Коркин кэриэһигэр норуоттар икки ардыларынааҕы турнир ыытыллыаҕа. Турнирга Армения, Казахстан, Белоруссия, Куба, Кыргызстан, Таджикистан, Монголия, Македония уонна Австралия бастыҥ бөҕөстөрө кыттыахтара. Ону таһынан, ЮАР, Иран, Индия, Молдавия, Турция, Узбекистан, Сербия уонна Болгария бөҕөстөрүн кытыннарар туһунан кэпсэтиилэр бара тураллар.
«Хайа да түгэҥҥэ успуорт дойдулар икки ардыларыгар эйэни олохтуур, норуоту түмэр күүстээх. Ааспыт өрөбүлгэ Александр Крылов кэриэһигэр Бүтүн Арассыыйатааҕы күрэстэһиилэр буолан ааспыттара. Ол кэннэ Бурятия хамаандата аныгыскы турнирга кыттаары устунан хаалла. Сотору тас дойдулартан кыттааччылары көрсүөхпүт диэн», — физическэй култуура уонна успуорт миниистирин бастакы солбуйааччыта Александр Бугаев эттэ.
Билигин Арассыыйа регионнарыттан кэлбит кыттааччылар Саха сирин сүүмэрдэммит хамаандатын кытта бэлэмнэнэ сылдьаллар. Олор истэригэр “Токио-2021” олимпиада финалистара Магомедхабиб Кадимагомедов уонна Заурбек Сидаков, Арассыыйа икки төгүллээх чөмпүйүөннэрэ Исраил Касумов уонна Разамбек Жамало уонна турнир түөрт төгүллээх кыайыылааҕа Евгений Жербаев бааллар. Саха сирин аатыттан көбүөргэ Арассыыйа бастыыр иһин күрэхтэһиитин икки төгүллээх кыайыылааҕа, Аан дойду бастыыр иһин күрэхтэһиитин бирииһин хаһаайына Станислав Свинобоев тахсыаҕа.
Сонун төрдө: CӨ Физическэй култуура уонна успуорт министиэристибэтэ
Сэҥээриилэр