Улуу тренер, педагог Дмитрий Петрович Коркин төрөөбүтэ 94 сыла

Бүгүн, 2022 с. балаҕан ыйын 5 күнүгэр, саха биллиилээх тренерэ, педагога, Саха АССР оскуолаларын үтүөлээх учуутала, Саха АССР, РСФСР уонна ССРС үтүөлээх тренерэ, Бочуот Знага итиэннэ Октябрьскай революция орденнар кавалердара Дмитрий Петрович Коркин төрөөбүтэ 94 сыла туолар.

Дмитрий Петрович 1928 с. балаҕан ыйын 5 күнүгэр Чурапчы оройуонун Кытаанах нэһилиэгэр төрөөбүтэ.

Аҕата Коркин Пётр Кириллович уонна ийэтэ Мария Андреевна эрдэ өлөннөр, үс оҕо тулаайах хаалаллар. Алта саастаах Диманы Лазаревтар дьиэ кэргэн иитэ ылаллар. Сотору сэрии саҕаланан, Чурапчы холкуостара хоту көһөрүллэллэр, Лазаревтар Булуҥҥа бараллар.

Дмитрий Булуҥ оройуонун Бороҕон нэһилиэгин сэттэ кылаастаах оскуолатын ситиһиилээхтик үөрэнэн бүтэрэр, оскуолаҕа үөрэнэр кэмигэр гимнастиканан утумнаахтык дьарыктанар. Салгыы, Дьокуускай куорат 2 №-дээх оскуолатыгар спортивнай секцияларга дьарыктанар, ГТО-ҕа куорат үс төгүллээх кыайыылааҕынан буолар.

1952-1956 cc. Ленинградтааҕы Герцен аатынан педагогическай институкка үөрэнэр. Биир сыл көҥүл тустуунан уонна самбонан дьарыктанан, бастакы разряд нуормаларын толорор, кэлин Ленинград чөмпүйүөнүнэн, “Буревестник” ДСО күрэхтэһиитин иккис призёрунан буолар.

Дойдутугар эргиллэн кэлэн, Одьулуун сэттэ кылаастаах оскуолатыгар завуһунан, нуучча тылын уонна литературатын учууталынан үлэлиир. Оройуон киинигэр Чурапчыга тустуу секциятын тэрийэр, 12 биэрэстэлээх сиргэ нэдиэлэҕэ үстэ сатыы кырынан – оҕолору эрчийэр.

Түөрт сыл буолан баран, тустууга таптала букатыннаахтык баһыйан, Чурапчыга көһөн киирэр уонна олоҕун сүрүн соругун – оҕо спортивнай оскуолатын тэрийиигэ утумнаах, өр сыллаах үлэтин саҕалыыр.

Кураанах миэстэҕэ эрчийэр оҕолору кытта үс саалалаах спорт корпуһун тутан таһаарар, тустууга сөп түбэһэр спортивнай тренажердары оҥотторор.

Эрчийии бастыҥ ньымаларыгар олоҕурбут спортивнай уһаарыллыыны барбыт Коркин үөрэнээччилэрэ сотору кэминэн үрдүк чыпчааллары дабайан бараллар.

Ол курдук, 1965 с. Вячеслав Карпов сахалартан бастакынан, ССРС үрдүнэн оҕолорго чөмпүйүөн буолар.

Вячеслав Карпов

1969 с. оҕолорго аан дойду чемпионатыгар Илларион Федосеев бакстаы, Семён Макаров үһүс буолаллар.

Илларион Федосеев

1967 c. Николай Захаров Польшаҕа буолбут «Олимпийскай эрэллэр» күрэхтэһиилэригэр кыайыылааҕынан тахсар.

Николай Захаров-Сахаачча

1969 c. ССРС чемпионатыгар Роман Дмитриев муҥутуур кыайыылааҕынан буолар,  Захаров иккис миэстэҕэ тахсаллар.

Роман Дмитриев

1972 с. Мюнхеҥҥа буолбут Олимпиадаҕа Роман Дмитриев чөипүйүөн үрдүк аатын ылан, тренерин үөрдэр-көтүтэр.

Чурапчы оскуолатыттан 175 – ССРС спордун маастара, 12 – норуоттар икки ардыларынааҕы кылаастаах спорт маастара, 4 – ССРС спордун үтүөлээх маастара иитиллэн тахсыбыта.

Ол гынан баран, Дмитрий Петрович тренер быһыытынан сулустаах чааһа 1976 с. буолбута.

Кини үөрэнээччилэрэ Роман Дмитриев, Павел Пинигин уонна Александр Иванов Монреальга буолбут Олимпиадаҕа ситиһиилээхтик кыттан, спорт эйгэтигэр дьоһун кылааты киллэрэллэр.

1977 с. Д.П. Коркин Дьокуускайга көһөн кэлэн, Үрдүкү спортивнай маастарыстыба оскуолатын уонна Саха сирин хамаандатын сүрүн тренердэринэн ананар.

Дмитрий Петрович Коркин 1984 c. олунньу 22 күнүгэр Дьокуускайга өлбүтэ. Көмүс уҥуоҕа төрөөбүт дойдутугар – Чурапчыга кистэммитэ.

Улуу тренер Д.П. Коркин үтүө, сырдык аата чиэстээхтик үйэтитиллэр. Ол курдук, кини аатын Чурапчытааҕы спортивнай интернат-оскуола чиэстээхтик сүгэр.

Дмитрий Петрович ыра санаатын толорон, 1999 с. Чурапчыга Физическэй культура уонна спорт института аһыллыбыта.

Улуу тренер, педагог Дмитрий Петрович Коркин аатынан СӨ физическэй культураҕа уонна спорка эйгэтигэр судаарыстыбаннай бириэмийэ олохтоммута.

Ираида Коркина-Чугдаара куйаар ситимин матырыйаалларыттан таҥан суруйда, хаартыскалары булла.