Бүгүн, кулун тутар 1 күнүгэр Уһук Илин эр дьоҥҥо уонна дьахталларга кикбоксинг лоу-кик дьиссипилиинэтин чөмпүйэнээтэ саҕаланна. «Дохсун» спорт уораҕайыгар сэттэ регион - Приморье, Хабаровскай, Камчатка кыраайдарын, Амур уобалаһын, Бурятия, Сахалин уонна Саха сирин 118 спортсмена кыттыаҕа. Саха сирин отучча эр киһи уонна дьахтар көмүскүөҕэ.
Чөмпүйэнээт Сэбиэскэй Сойуустан кик-боксиҥҥа аан дойду бастакы чөмпүйүөнэ Александр Иванов кэриэһигэр ыытыллар. Бүгүн - бастакы киирсиилэр, субуотаҕа - полуфинал, өрөбүлгэ – кыайыылаахтары быһаарыы. Барыта 19 ыйааһын көрүҥүнэн, сааһынан үс бөлөххө арааран киирсиилэр буолуохтара.
Өрөспүүбүлүкэ хомуур хамаандатыгар эр дьонтон киирдилэр:
Спиридон Антонов, Иван Степанов (51 кг), Михаил Слепцов (54 кг), Никита Ковлеков (57 кг), Сергей Иванов, Мичил Юшков, Тимофей Сивцев (60 кг), Вадим Колтовской, Антон Ле, Виктор Ломпоров, Филипп Кузьмин, Павел Попов (63,5 кг), Егор Евстафьев, Габриел Афанасьев, Данис Спрязев, Дмитрий Иванов, Максим Леонтьев (67 кг), Айтал Петров, Виктор Попов (71 кг), Гэсэр Гатыпов (75 кг), Валентин Шелепанов, Артём Будко (81 кг), Михаил Еремеев (86 кг), Адулай Хуцуруев (91 кг).
Дьахталлартан: Надежда Павлова (48 кг), Виктория Кашлакова (52 кг), Юлия Петрова, Айдана Мирбекова (56 кг), Сарыада Брызгалова (63,5 кг).
Финалистар, ол эбэтэр кыһыл уонна үрүҥ көмүс наҕараадаҕа тиксибиттэр, Кемерово куоракка Арассыыйа чөмпүйэнээтигэр кытта барыахтара. Маны сэргэ, күрэхтэһии түмүгүнэн, VIII Норуоттар икки ардыларынааҕы «Азия оҕолоро» оонньууларга кыттааччылары талыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
