Cаха сиригэр буолан ааспыт быыбардары тэрийиигэ 423 мөл. солк. көрүллүбүт, ол иһигэр 350 мөл. солк. – норуот дьокутааттарын талыыга. Бу туһунан Саха сиринээҕи киин быыбардыыр хамыыһыйа бэрэссэдээтэлин солбуйааччы Ирина Конакова иһитиннэрэр.
“350 мөл. солк. норуот дьокутааттарын талар быыбарга туһаныллыбыт, оттон атына – Ил Дарханы талыыга”, — диэтэ Ирина Конакова.
7 тыһ. быыбардыыр хамыыһыйа чилиэннэрин хамнастарыгар 220 мөл. солк. көрүллүбүт. Оттон ыраах сытар сирдэргэ салгынынан докумуоннары тиэрдиигэ 100 мөл. солк. ороскуоттаммыт.
“Биир чааска бөртөлүөтү көтүтэргэ 200-400 тыһ. солк. баранар. Биһиги “Дельта К”, АЛРОСА, “Полярные авиалинии” авиахампаанньалары туһаммыппыт”, — диэтэ Конакова.
Бүлүтүөннэри уонна да атын бэчээттэнэр бородууксуйаны бэчээттииргэ 10 мөл. солк. бараабыттар. Оттон видеонан кэтээн көрүүгэ эмиэ оччо харчыны куппуттар.
