2022 сыллаахха орнитологтар алтан харах диэн хаас көрүҥүн чинчийии уонна харыстааһын өттүгэр научнай-чинчийэр үлэ түмүгүн оҥордулар. Үлэни АЛРОСА хампаанньа өйөөтө. Бу хаас ордук аҕыйах ахсааннааҕынан уонна эмсэҕэлиэн сөптөөх көрүҥүнэн биллэр, онон, Саха сирин Кыһыл кинигэтигэр баар уонна харыстанар.
АЛРОСА Экологическай киинин уонна Дьокуускайдааҕы Криолитозона биологическай кыһалҕаларын үөрэтэр Институтун кытта дуогабар түһэрсибиттэрин чэрчитинэн, орнитолог учуонайдар алтан хараҕы үөрэтэр, чинчийэр соруктаах уонна АЛРОСА бырамыысаланнай эбийиэктэрин аттынааҕы сиргэ-уокка сэдэх көтөр популяциятын быһаарар туһуттан, Мууна үрэххэ эспэдииссийэҕэ тиийбиттэр. Алтан харах сүрүннээн төрүүр-ууһуур, олохсуйар сирэ Үөһээ Муунаҕа алмааһы хостуур Удачнайдааҕы горнай-байытар кэмбинээттэн чугас сиргэ баар эбит. Маны таһынан, учуонайдар бу хаас көрүҥүн харыстаан хаалларар соруктаах стратегияны оҥорууга эмиэ үлэлээбиттэр.
Биир дьыллааҕы миграцияны уонна уйаланар учаастактары быһаарарга, 10 Druid GSM-передатчиктарын туттубуттар. Бу балары орнитологтар эспэдииссийэ кэмигэр хаастарга иилбиттэр. Передатчиктар улахан уонна эдэр хаастарга кэтэрдиллибиттэр. Бу оччугуй тэриллэр көтөрдөргө мэһэйдээбэттэр уонна кинилэр сиргэ-ууга көҥүл сылдьалларын хааччахтаабаттар эбит. Ол курдук, алта передатчигы алта алтан харахха, иккини хоҥор хаастарга иилбиттэр. Оттон өссө иккини алтан хараҕы кытта кыстыыр сирдэрж биир буолуутун уонна соҕуруу көтөр болдьохторун быһаарар туһуттан, көҕөннөргө иилбиттэр.
2022 сыллааҕы эспэдииссийэ түмүгүнэн, учуонайдар көтөр ахсаанын эрдэтээҥҥи сыллар чинчийиилэригэр холоотоххо бигэ туруктаах диэбиттэр. Мууна үрэх 140 килэмиэтир устатын тухары учуонайдар 4-н 7-ҕэ диэри ахсааннаах алтан харах хаас алта ууһун бэлиэтээбиттэр.
Чинчийии көрдөрбүтүнэн, алтан харах ахсаанын бу ыйыллыбыт кэрчик сиргэ орто үрдүк диэн быһаарбыттар. Ол эрээри, инникитин өссө даҕаны ымпыктаан-чымпыктаан чинчийии ирдэнэр.
Маны таһынан, АЛРОСА тулалыыр эйгэҕэ куһаҕан дьайыыта бэлиэтэммэтэх. Бу маны Мууна үрэх сиригэр-уотугар хамсыыр-харамай эгэлгэтэ уонна Кыһыл кинигэҕэ киирбит көрүҥнэр бааллара бигэргэтэр. АЛРОСА бу чинчийиигэ 3 мөл. солкуобай кэриҥэ суумманы көрбүт.
АЛРОСА пресс-сулууспатын матырыйаалыттан
