Саха сиригэр Арҕаа Сибииртэн итии салгын саба халыйан кэллэ. Онон, халлааммыт лаппа сылыйар чинчилээх. Бүгүн, ыам ыйын 7 күнүгэр, Дьокуускайга уонна киин улуустарга инньэ бэс ыйыныы +15...+20 кыраадыс сылаас буолара күүтүллэр.
Гидромет сулууспа Саха сиринээҕи салаата иһитиннэринэн, бүгүн күнүс Дьокуускайга халлаан тэмпэрэтиирэтэ +17...+19 кыраадыска тиийэ сылыйыа. Күн бүтүүтэ көтө сылдьан кыралаан ардыа.
Киин улуустарга күнүһүн +15...+20 буолуо үһү, соҕуруулуу-арҕаа, хотугулуу-илин – +9...+14, арҕаа уонна хотугулуу-арҕаа – +4...+9 кыраадыс.
Итини таһынан, бүгүн Сунтаарга, Ньурбаҕа, Үөһээ Бүлүүгэ, Бүлүүгэ, Ленскэйгэ, Өлүөхүмэҕэ, Өлөөҥҥө, Мииринэйгэ, Эдьигээҥҥэ, Намҥа уонна Дьокуускай куоракка сөкүүндэҕэ 15-20 миэтэрэ түргэннээх тыалырыа. Эдьигээн сорох түөлбэлэригэр хаардыа.
