Ыам ыйын 15 күнүгэр эбиэттэн киэһэ 16:00 чаастааҕы туругунан, Өлүөнэ эбэ мууһа урукку сыллардааҕар икки күн эрдэлээн, Покровскай уонна Дьокуускай Табаҕатын аннынан хамсаата. Сабаҕалыылларынан, уу таһыма ыам ыйын 16 – 17 күннэригэр үрдүөхтээх. Ол туһунан анал мунньахха СӨ Экологияҕа, айылҕа баайын туһаныыга уонна ойуур хаһаайыстыбатыгар миниистирин солбуйааччы Анатолий Алексеев кэпсээтэ.
“Өлүөнэ өрүс ити кэрчигэр уу таһыма нуорматтан 1,5 миэтэрэ үрдүүрэ күүтүллэр. Ыам ыйын 16 уонна 17 күннэригэр халаан уута Покровскай куорат, Дьокуускай Табаҕатын, Даркылааҕын уонна быһытын таһынааҕы намтал сирдэригэр тахсыан сөп”, – диир миниистир солбуйааччыта.
Ыам ыйын 15 күнүгэр киэһэ 19:00 чаастааҕы туругунан, Эбэ күүстээх көмүөлэ Хаҥалас уонна Өлүөхүмэ улуустарынан устар. Муус алын кирбиитэ Хаҥалас кыраныыссатыгар кэлбит, Тойон Арыы бөһүөлэк аннынан хойуутук ааһар.
"Бу күннэргэ “Хангаласский” гидропост таһынан эмиэ муус хамсыыра сабаҕаланар. Хаҥалас, Нам, Мэҥэ Хаҥалас, Уус Алдан уонна Дьокуускай анныларынан муус харыан сөп" дииллэр.
Кыыллаах нэһилиэнньэлээх пуун таһынан, Өлүөхүмэ куораттан үөһэ, мууһу дэлби тэптэрбиттэр. Ол түмүгэр Өлүөхүмэ таһыгар уу таһыма 724 см тиийэ түспүт (муҥутуур таһым – 1250 см). 1-кы уонна 2-с Нөөрүктээйиттэн уу өссө да бара илик.
Алдан өрүс көмүөлүн сүрүн өттө Уус Алданынан, Томпонон уонна Тааттанан ааһа турар. Муус алын кирбиитэ Уус Алдан Дыгдалыгар тиийбит.
