Бу нэдиэлэҕэ Саха сирин үгүс улууһугар халлаан биллэ сөрүкүөҕэ. Киин уонна илин эҥээр улуустарга түүнүн, бэл, тоҥоруон сөп. Күн-дьыл туругун туһунан Гидромет-киин Саха сиринээҕи салаатын салайааччыта Татьяна Маршалик кэпсиир.
“Бу нэдиэлэҕэ халлааммыт ый баччатынааҕы бэйэтин нуорматыгар түһүөҕэ. Ону “тымныйыы” диир табыллыбат. Тоҕо диэтэххэ, ааспыт 8 – 10 күн устата ураты итии күннэр турдулар. Бэл, 2008 сыллааҕы тэмпэрэтиирэ рекордун куоһарбыта”, – диэн Татьяна Маршалик этэр.
Өрөспүүбүлүкэ арҕааҥҥы эҥээригэр номнуо сөрүүкээтэ. Красноярскайтан кэлбит тымныы салгын Ленскэйи, Мииринэйи уонна Бүлүү сүнньүн сабардаан турар. Сорох сиргэ күүскэ, сороххо наллаан ардыыр, быыһыгар этиҥнээх ардах түһэн ааһар.
“Ленскэйгэ уонна Өлүөхүмэҕэ итии күннэр өссө да туруохтара. Тэмпэрэтиирэ уһук арҕааҥҥы улуустарга сөрүүкүөҕэ. Киин улуустарга эмиэ оннук буолара күүтүллэр – кэлэр үс күн устатыгар сөрүкүөҕэ”, – диэн Т.Маршалик салгыы быһаарар.
Бэс ыйын 5 – 6 күннэригэр киин, илин эҥээр улуустарга уонна Уус Майдаҕа түүнүн 0..+5 кыраадыска тиийэ түһүөҕэ. Сорох сиргэ инньэ -2 буолуоҕа. Оттон күнүһүн ити ыйыллыбыт сирдэргэ +17...+22 буолара күүтүллэр.
“+18...+19 кыраадыс диэн – дьыл баччатыгар нуорма. Ол гынан баран, өрөбүллэртэн эмиэ сылыйан барыаҕа”, – диэн Татьяна Маршалик түмүктээтэ.
Бэс ыйын 4 күнүгэр Дьокуускайга күнүс +21...+23 кыраадыс сылаас, сөкүүндэҕэ 8 – 13 миэтэрэ түргэннээх тыаллаах буолуо.
