Бу ый бүтүүтүгэр Саха сиригэр “Авиалесоохрана” тэрилтэ баһаары умулларар үһүс сөмөлүөтэ кэлиэҕэ. Билиҥҥи туругунан, 16 улууһу хабан икки сөмөлүөт үлэлии сылдьар. Ол туһунан анал мунньахха Ил Дархан Айсен Николаев иһитиннэрдэ.
Бэс ыйын 25 күнүнээҕи туругунан, Саха сиригэр барыта 544 тыһыынча гаа иэннээх 175 ойуур умайа турар. Саамай уустук балаһыанньа Уус Майда уонна Өлүөхүмэ улуустарыгар үөскээбит. Баһаарынайдар сүрүн бөлөхтөрө ити икки сиргэ үлэлии сылдьаллар. Итини таһынан, ураты болҕомтону Орто Халыма Сылгы Ыытарын таһыгар турбут уот ирдиир. Уот аһара тэнийэн, 16 тыһыынча гаа иэннээх сири хабан умайа турар. Инньэ гынан, Сылгы Ыытарга 105 киһи, ууну кутар тэриллээх биир бөртөлүөт үлэлиир. Ан-26 “Атмосфера” ардаҕы түһэрэр сөмөлүөт баар.
Томпоҕо эмиэ бөрүкүтэ суох балаһыанньа үөскээбит. Теплай Ключ уонна Хаандыга икки ардыгар 104 гаа иэннээх улахан уоту умуллара сылдьаллар эрээри, куталаах-маардаах дойду буолан, 135 киһи барыта хара илиилэринэн кэриэтэ үлэлииллэр. 25 эрэ тиэхиньикэлээхтэр.
“Баһаардар улахан аҥаардара уустук суоллаах-иистээх уонна кырыы сирдэргэ бааллар. Төһө даҕаны уот бастаан утаа улахан куттала суох курдук буоллар, тыал уларыйыа, күүһүрүө эрэ кэрэх, нэһилиэнньэлээх пууннарга саба сүүрэн кэлиэн сөп. Онон бары сулууспалар күүһү-уоҕу түмүөхтэрин уонна кыра да баһаардары улаата иликтэринэ умулларыахтарын наада”, – диэн Айсен Николаев бэлиэтээтэ.
Уопсайынан, Саха сиригэр ойуур уотун бохсууга барыта 1100 киһи үлэлии сылдьар. Биһиги дьоммутугар “Авиалесоохрана” тэрилтэ үлэһиттэрэ уонна атын эрэгийиэннэртэн кэлэ сылдьар десантниктар көмөлөһөллөр.
