От ыйын 1 күнүнээҕи туругунан, Саха сиригэр Алдаҥҥа, Үөһээ Дьааҥыга, Ленскэйгэ, Өлүөхүмэҕэ, Уус Майдаҕа уонна Томпоҕо барыта 116 697 гаа иэннээх тоҕус баһаары хааччахтаатылар (локазиовали). Ол иһигэр Теплай Ключка уонна Хаандыгаҕа чугаһаабыт уоттары саба туттулар. Ити туһунан СӨ Экологияҕа миниистирин солбуйааччыта Андрей Коноплев иһитиннэрдэ.
Миниистир солбуйааччыта эппитинэн, ааспыт суукка иһигэр 203 975 гаа иэннээх 46 ойуур баһаарын уонна 0,2 гаа иэннээх хонуу-сыһыы баһаарын умулларбыттар.
“Итини таһынан, авиация уонна спутник нөҥүө кэтээн көрүү түмүгэр, барыта 1190,5 гаа иэннээх 11 сиргэ саҥа ойуур уота турбутун буллубут”, – диир Коноплев.
Онон, от ыйын 1 күнүнээҕи туругунан, СӨ Экологияҕа министиэристибэтэ иһитиннэрэринэн, Саха сиригэр 18 муниципальнай тэриллии сиригэр-уотугар уопсайа 331 805 гаа иэннээх 107 ойуур баһаара, 3496 гаа иэннээх хонуу-сыһыы баһаара баар. Уоту утары барыта 1431 киһи уонна 74 араас кыамталаах тиэхиньикэ үлэлиир.
Өрөспүүбүлүкэҕэ билигин даҕаны эрэгийиэн таһымнаах ойуурдарга ыксаллаах быһыы-майгы салҕанар. Улуус таһымнаах ыксаллаах мыһыы-майгы Үөһээ Бүлүүгэ, Үөһээ Халымаҕа, Өлүөхүмэҕэ, Орто Халымаҕа, Томпоҕо уонна Уус Майдаҕа биллэриллэн турар.
Санаттахха, Ил Дархан Айсен Николаев ыйааҕынан, Саха сиригэр бэс ыйын 26 күнүттэн баһаартан ураты сэрэхтээх буолуу биллэриллибитэ. Онон сибээстээн, ойуурга-тыаҕа тахсар, сиргэ уоту оттор, бөҕү-саҕы уматар уонна мангаалга астанар-үөллэнэр көҥүллэммэт.
Бэй.кэр.
Хаартыска: СӨ Экологияҕа министиэристибэтин пресс-сулууспата.
