Улахан урбаанньыт уонна уопсастыбанньык Афанасий Алексеев тус ситимигэр Амма өрүс баһынан мас кэрдэргэ туруммут «Ангара» ХЭТ уонна «Вудлен 24» хампаанньалары салайар Максим Белобородов туһунан иһитиннэрии таһаарда.
Кини этэринэн, бу киһи икки улахан холуобунай дьыалаҕа тардылла сылдьыбыт. Ол курдук, кини Иркутскай уобалас Ойуур департаменын үлэһитигэр 1 мөл. солк. биэрээри сылдьыбыта биллибит. Кини бэрэбиэркэтэ суох ойуур учаастагын уларсыкка ылаары соруммут.
Иккис дьыалата өссө улахан хабааннаах. Манна полиция сэттэ үлэһитэ 2018 - 2022 сылларга ойууру уоран кэрдээччилэригэр «хахха-дурда» буола сылдьыбыттар. Онон, уоран кэрдээччилэр Иркутскай уобалас маһынан талбыттарынан эргинэ сылдьыбыттар. Силиэстийэ быһаарбытынан, полиция үлэһиттэрэ оҥорбут «өҥөлөрүгэр» 5 мөл. тахса солкуобайдаах бэриги ылбыттар. Билигин бу дьыала суукка көрүллэр.
Иккис холуобунай дьыала тэриллибитин кэннэ 2023 сыл сэтинньи 13 күнүгэр «Ангара» уонна «Вудлен 24» генеральнай дириэктэрэ уларыйбыт. Максим Анатольевич оннугар кини чугас аймаҕа Татьяна Белобородова буолбут. Бу дьахтар күн бүгүн маһынан эргинэр 8 хампаанньаны салайар. Быйыл Кытайга маһы атыылааччылартан саамай модуннара аатыран «Сыл бастыҥ трейдерэ» диэн ааты сүкпүт.
Онон, Афанасий Алексеев бу чахчыларынан туох дьон биһиги ойуурбутун кэрдэргэ туруммуттарын өйдөтөр уонна туохха да бэриммэккэ Аммабыт ойуурун көмүскэлигэр бүттүүн турунарга ыҥырар. Онуоха, сорох дьон бу иһитиннэриини «тоҕо мунньах иннинэ таһаарбата» диэн сонньуйаллар. Санатар буоллахха, ахсынньы 5 күнүгэр СӨ Арбитражнай суута СӨ Экология министиэристибэтин ирдэбилинэн СӨ Арбитражнай суута "Ангара" ХЭТ кытта ойууру түүлэһиигэ дуогабары көтүрбүтэ.
Сонун төрдө: Афанасий Алексеев тус ситимэ (Арассыыйаҕа бобуулаах)
Видео: https://t.me/kyymsakha
