Бу күннэргэ өрөспүүбүлүкэ үрдүнэн халлаан тымныйар. Сорох улууска былыт кэлиэ, кыралаан хаардыа эрээри, тэмпэрэтиирэ син биир түһэрэ күүтүллэр. Ол курдук, тымныы полюһа Сахабыт сирин хотугулуу-илиҥҥи өттүгэр сыҕарыйыа, чуолаан, Өймөкөөҥҥө, Уус Алдаҥҥа уонна Томпоҕо тиийиэ. Ити эҥээр чэппиэр киэһэттэн бастакы -50 кыраадыстаах тымныылар түһүөхтэрэ. Ол туһунан Гидромет-киин салайааччыта Татьяна Маршалик СИА-ҕа кэпсээбит.
“Киин улуустарга бу түүнтэн тымныйыа. Кэккэ сирдэргэ -33 кыраадыстан -38 буолуоҕа. Илин эҥээргэ -40 тиийиэ. Оттон чэппиэртэн Өймөкөөҥҥө, Уус Алдаҥҥа уонна Томпоҕо -50-тан тахсыаҕа.
Ахсынньы 12 – 13 күннэриттэн саҕалаан нэдиэлэ бүтүөр диэри киин улуустарга, ол иһигэр Дьокуускай куоракка, эмиэ тымныйара күүтүллэр – -39...-44 икки ардынан халбаҥныа, илин эҥээргэ -43...-48 буолуоҕа. Күнүскүтэ түүҥҥүтүттэн 2 – 3 эрэ кыраадыһынан араастаһыа. Ол аата, түүнүн -44 буоллаҕына, күнүһүн, быһа холоон, -41 буолуо”, – диир Татьяна Маршалик.
Саха сиригэр арыый ичигэс күннэри Ленскэй олохтоохторо күүтүөхтэрин сөп. Ити эҥээри Иркусткай уобалаһынан уонна Красноярскай кыраайынан ааһан эрэр циклон таарыйыа. Онон, Ленскэйгэ түүнүн -20 – 25, күнүһүн -13 – 18 кыраадыс буолуоҕа.
“Итини таһынан, Чукотканан ааһар сылаас салгын Аллараа Халыма, Аллайыаха уонна Усуйаана улуустарын таарыйыаҕа. Инньэ гынан, күнүһүн -20 – 25 кыраадыс буолара күүтүллэр”, – диэн Гидромет-киин салайааччыта быһаарар.
Татьяна Маршалик этэринэн, өрөбүллэргэ халлаан биэс-хас кыраадыһынан сылыйыахтаах.
