Саха сирин похуотчут-туристара Бүтүн Арассыыйатааҕы «Дальний Восток - Земля приключений» күрэскэ Муома улууһун Мавра Черская хайатыгар тахсыы туһунан киинэни ыыттыллар.
Киинэҕэ 16 киһилээх бөлөх уон тоҕус хонуктаах похуокка 2231 м үрдүктээх хайаҕа тахсыыта көстөр. Бу хайа бөдөҥ геолог, географ уонна Сибиири чинчийээччи Иван Черскэй кэргэнин уонна көмөлөһөөччүтүн Мавра Павловна аатын сүгэр. Кини чинчийээччи өлбүтүн да кэннэ дьарыгын бырахпатаҕа.
Бу уһун уонна уустук похуокка үксүн дьахталлар кытыннылар. Кинилэр ыарахан үрүсээктээх тургутууну этэҥҥэ аастылар. Кыттааччы Лана Михайлова похуот олус умсугутуулаах буолла диэн кэпсиир. Ол курдук, хайа быыһыгар V көрүҥнээх аппаны туораабыттар, кварц үөскээбит тымырыгар түбэспиттэр, күлүмүрдэс кристаллары, хайа күөллэрин кэрэхсээн астыммыттар-дуоһуйбуттар.
Юрий Трутнев көҕүлээбит Бүтүн Арассыыйатааҕы «Дальний Восток - Земля приключений» күрэскэ Уһук Илиҥҥэ айан туһунан тэттик киинэлэри ахсынньы 30 күнүгэр диэри туталлар.
Сонун төрдө: CӨ Бырабыыталыстыбатын уонна Ил Дарханын пресс-сулууспата
