Киир

Киир

Бэйэбит кыһалҕабытыгар, саҥа дьыл иннинээҕи сүпсүлгэҥҥэ аралдьыйан, Анапаҕа, Крым, Кубань уонна Запорожье кытылларыгар улахан иэннээх алдьархай тахсыбытын аанньа ахтыбакка хаалбыппыт.

Ол курдук, тохсунньу 15 күнүгэр аатырбыт Харака муорабыт Керчьтээҕи силбэһиитигэр «Волгонефть 212» уонна «Волгонефть 239» танкердар саахаллананнар, байҕалга 4000 туонна кэриҥэ мазут тохтубута. Ол түмүгэр, байҕалга киһи ааҕан сиппэт элбэх харамайа өллө-сүттэ. Ким танкердара буолалларын, ханна тоҕо баран испиттэрин, туохтан саахалламмыттарын чопчу аһаҕастык суруйа иликтэр. Мазут Хара байҕалтан Азов байҕалыгар тиийэр. 
 
Байҕал кытылын мазуттан ыраастыы, көтөрдөрү быыһыы тыһыынчанан волонтер тахсыбыта. Холобура, тохсунньу 5 күнүнээҕи туругунан, ветеринардар 5000 кэриҥэ көтөрү быһаабыттара. Оттон тохсунньу 2 күнүгэр диэри волонтердар 71 тыһ. туонна кумаҕы тиэйэн таһаарбыттара. Быыһыыр, ыраастыыр үлэ бүтэр уһуга көстүбэт. Волонтер ахсаана билигин да тиийбэт. Онуоха, пляһы мазуттан ыраастыы сылдьыбыт 17 саастаах устудьуон соһуччу өлбүтүн туһунан суруйдулар.

Манна даҕатан, волонтерунан барыан баҕалаахтар Добро.рф аан ситимҥэ киирэн бэлиэтэнэллэрин бэлиэтиибит. Оччоҕо кинилэргэ босхо айанныыр уонна Яндекстан аһыыр  купон биэрэллэр эбит. Витязево сэлиэнньэтигэр штабка тиийдэхтэринэ, кинилэргэ анал таҥас-тэрил биэрэллэр уонна инструктаж ыыталлар. Түөрт сиринэн олордоллор уонна аһаталлар, үлэлиир сирдэригэр таһаллар.

Тимирбит танкердары бас билээччилэр бэс ыйын 16 күнүгэр диэри хостуохтаахтар. Ол эрээри онно хаалбыт мазуту хачайдаан ылар кыаллыбат курдук. Тоҕо диэтэххэ, ниэптэн уратыта диэн, +10 кыраадыстан намыһах температураҕа хатан хаалар эбит.
Бэйэ кэр

Санааҕын суруй

Бүтэһик сонуннар