Акулина Анисимова диэн Усуйаана улууһун Казачье сэлиэнньэтин олохтооҕо Снежок диэн ойуур куобаҕын иитэ сылдьалларын туһунан СИА кэрэспэдьиэнигэр кэпсээтэ.
Куобаҕы былырыын сэтинньигэ булбуттар. Эһэлэрэ балыктыы сылдьан хаарга куобах суола баарын көрбүт. Онон сирдэтэн куобаҕы булан ылбыт. Харамай тоҕо эрэ куоппатах. Ол иһин тутан ылан дьиэтигэр аҕалбыт.
Куобах маҥнай дьонтон куттанар эбит. Арай кыыстара Каролина аһатан барбытыгар чугаһыыр буолбут. Билигин эдэр хаһаайкатын батыһа сылдьар, аһаары кэнники атахтарыгар турар. Куобах моркуоптан ураты оҕуруот аһын уонна фруктаны сөбүлээн сиир.
Ыаллар куоскалара Сножогу кытта бодоруһа сатаабат, толлор курдук туттар эбит.
Сонун төрдө: СИА