Бу нэдиэлэҕэ халлааммыт уонча кыраадыһынан сылыйар үһү. Лаамы уонна Беринг байҕалларыттан сылаас салгын кэлиэҕэ. Ол эрээри, хаардыа уонна тыалырыа диэн Гидромет-киин салайааччыта Татьяна Маршалик иһитиннэрэр.
“Бүгүн өрөспүүбүлүкэ хотугулуу-илиҥҥи өттүгэр Лаамы уонна Беринг байҕалларыттан сылаас салгын балаһата кэллэ. Онон Өймөкөөн уонна Томпо улуустарыгар -50 кыраадыстаах тымныылар кыйданыахтара. Ордук Аллараа Халымаҕа уонна Алайыахаҕа сылыйыаҕа, көтө сылдьан күүскэ хаардыаҕа”, – диэн Татьяна Маршалик кэпсиир.
Синоптик этэринэн, бу чэппиэртэн ол сылаас салгын балаһата киин улуустарга эмиэ кэлиэхтээх, бэрт кыратык Бүлүү сүнньүн таарыйан ааһыа.
“Нэдиэлэ бүтүөр диэри тымныы бары улууска уҕарыаҕа. Халлаан ортотунан 10 кыраадыһынан сылыйыа. Бүгүн киин улуустарга халлаан уларыйбат, уруккутунуу туруоҕа: түүнүн -40, туманнаах, күнүһүн -30 буолуоҕа. Оттон илинтэн сылаас салгын кэллэҕинэ, күнүс -24...-30, түүн -29...-35 буоларын күүтэбит. Даҕатан эттэххэ, олунньу бастакы декадатыгар бары улуустарга тэмпэрэтиирэ нуорматтан намыһах этэ”, – диэн Татьяна Маршалик этэр.
