Бу нэдиэлэҕэ халлааммыт халбаҥныыр чинчилээх. Сибиир диэкиттэн кэлэр антициклон арҕааҥҥы уонна киин улуустарга тымныы салгыны үүрэн аҕалыа, ол түмүгэр ити улуустарга -38 кыраадыска тиийэ тымныйыа. Онтон өрөбүллэргэ соҕуруулуу-арҕаа улуустарга -8 кыраадыска тиийэ сылыйыа.
“Чуумпу байҕалтан кэлбит итии салгын балаһатын дьайыытынан бүгүн уонна сарсын киин уонна хотугулуу-илиҥҥи улуустарга халлааммыт сылаас буолуо. Нэдиэлэ ортотуттан Сибиир антициклонун сабыдыалынан арҕааҥҥы уонна киин улуустарга салгы эмискэ тымныйыа, -33...-38 кыраадыс тымныы буолара күүтүллэр”, – диэн СИА-ҕа УГМС Саха сиринээҕи салаатын үлэһитэ Саргылаана Никитина кэпсиир.
Метеоролог эппитинэн, ол да буоллар өрөбүллэргэ халыҥ былыт халҕаһата кэлэринэн, халлааммыт эмиэ сылыйыахтаах.
“Олунньу 20 – 21 күннэригэр Соҕуруулуу-Арҕааҥҥы Сибииртэн кэлэр салгын балаһатын дьайыытынан өрөспүүбүлүкэ хотугулуу-арҕаа уонна арҕааҥҥы улуустарыгар -15...-20 тымныы кыраадыс буолуоҕа. Оттон өрөбүллэргэ соҕуруулуу-арҕаа -8...13, киин улуустарга -17...-22 буоларын күүтэбит. Түүнүн, быһа холоон, -30 кыраадыска тиийиэхтээх”, – диир Саргылаана Никитинэ.
