Бу нэдиэлэ бүтүөр диэри халлааммыт тымныы буолуо. Онтон сыыйа сылыйыа.
Соҕуруулуу-арҕааҥҥы улуустарга бу нэдиэлэҕэ -8 кыраадыска тиийиэҕэ, Халыма-Индигиир сүнньүгэр халлаан эмиэ сылыйыа. Киин улуустарга өрөбүлтэн ылааҥытыйан барыа. Ити туһунан Гидромет-киин үлэһитэ Саргылаана Никитина кэпсиир.
“Кулун тутар бастакы күнүттэн салгын баттааһына күүскэ үрдээтэ уонна Арктика кытылыттан тымныы салгын үрэн, кыһыммыт эргийэн кэлбиккэ дылы буолла. Хотугулуу-арҕааҥҥы уонна хотугулуу-илиҥҥи улуустарга кыраадыс -48...-53 буолан турар. Халлааммыт бээтинсэҕэ диэри ити курдук турар чинчилээх. Ол гынан баран, Халыма-Индигиир сүнньүгэр былыт кэлиэҕэ, халлаан арыый сылыйыаҕа. Итини сэргэ сааскылыы күннэр соҕуруулуу-арҕаа кэлиэхтэрэ – -8... -13 буолуоҕа”, – диэн Саргылаана Никитина сэһэргиир.
Өрөспүүбүлүкэбит киин улуустарыгар халлаан субуотаттан, өрөбүлтэн саҕалаан сылыйыа эрээри, тыаллаах-куустаах буолуоҕа.
“Бээтинсэҕэ диэри өрөспүүбүлүкэ үгүс улууһугар -40...-45 кыраадыс туруоҕа, былыт кэллэҕинэ -32...-37 буолуоҕа. Күнүһүн -25...-30 буолара күүтүллэр. Ол кэннэ өрөбүллэргэ тыалырыа эрээри, тэмпэрэтиирэбит дьыл кэминээҕи нуорматыгар түһүөҕэ, күнүһүн -20 кыраадыска тиийиэ. Сөкүүндэҕэ 3 – 8 миэтэрэ түргэннээх тыаллаах буолуо”, – диэн синоптик быһаарар.
