Арҕааттан кэлэр циклоннар сабыдыалларынан, бу күннэргэ Сахабыт сиригэр халлаан лаппа сылыйаары турар. Субуотаттан саҕалаан сорох улуустарга күнүһүн инньэ -1 кыраадыс эрэ буолуоҕа.
Гидромет-киин Саха сиринээҕи салаата иһитиннэрэринэн, бүгүн, бээтинсэҕэ, ханна даҕаны улаханнык хаардыыра биллибэт. Арай хотугулуу-арҕаа уонна арҕааҥҥы улуустарга кыралаан түһүөҕэ, кыраһалыа диэххэ сөп.
Бүгүн күнүс киин улуустарга -10...-15, арҕааҥҥыларга -3...-8, оттон хотугулуу-илин -20...-25 кыраадыс буолара күүтүллэр. Субуотаҕа уонна баскыһыанньаҕа халлаан өссө сылыйыаҕа: киин улуустарга күнүс -7...-12, илин уонна хоту -12...-17, арҕаа -1...-7 буолуо диэн күнү-дьылы кэтээн көрөөччүлэр этэллэр.
Дьокуускай куоракка бээтинсэ күн күнүһүн -14...-16 буолуоҕа. Өрөбүллэргэ арыый сылыйан, -8...-10 кыраадыска тиийиэҕэ.
