Дьокуускайга Сайсары күөл хомуһун ыраастаан эрэллэр. Аахсыйаны СӨ Экология, айылҕаны туһаныы уонна ойуур хаһаайыстыбатын министиэристибэтэ киин куорат уокуруктааҕы дьаһалтатын кытта тэрийдилэр. Тэрээһини Аан дойдутааҕы уу ресурсаларын күнүгэр анаатылар.
«Ыраастааһыҥҥа үс погрузчик, тиһиликтээх тыраахтар уонна сэттэ самасыбаал үлэлиир. Хомус наһаа үүннэҕинэ, күөл уолан барыан сөп, онон ыраастыыр хайаан да наада», – диэн биэдэмистибэ үлэһитэ кэпсээтэ.
Сайсары күөл кытылын тупсаран оҥоруу Дьокуускай сайдыытын маастар-былааныгар киирэр. «Ытык Сайсары күөл» РФ норуоттарын култууратын уонна устуоруйатын пааматынньыктарын биир кэлим судаарыстыбаннай эрэйиэстиригэр эрэгийиэн таһымнаах култуура нэһилиэстибэтин быһыытынан киллэриллибитэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
