Ыам ыйын 27 күнүгэр АЛРОСА Экологияҕа киинин исписэлиистэрэ Чернышевскайдааҕы балык собуотун үлэһиттэрин кытта хампаанньа Экологияҕа куттал суох буолуутун уонна тулалыыр эйгэ харыстабылын кэлим бырагырааматын чэрчитинэн, Чернышевскай бөһүөлэгин таһыгар Бүлүү өрүскэ 800 тыһыынча кэриҥэ чыыр ыаматын ыыттылар.
Чыыр – минньигэс эттээх бултанар күндү балык буоларын таһынан, Саха сиригэр балык булдун биир тутаах көрүҥэ. Итини таһынан, чыыр күөллэр уонна өрүстэр эко-систиэмэлэригэр кырата суох оруоллаах, балык арааһа элбииригэр үтүө дьайыылаах. Бэйэтэ атын сиэмэх балык аһылыга буоларын таһынан, араас буортулаах организымнары сиэн, уу хаачыстыбатын тупсарар.
“АЛРОСА үлэлиир сирдэригэр айылҕаны чөл тутар, нэһилиэнньэ доруобуйатын харыстыыр туһугар, хампаанньа Экологияҕа киинэ элбэх тэрээһини ыытар. Ол иһигэр балык ахсаанын чөлүгэр түһэрэр. Чуолаан эттэххэ, Чернышевскайдааҕы балык собуотун кытта сыл аайы өрүстэргэ уонна күөллэргэ балык ыамаларын ыытабыт, – диэн АЛРОСА Экологияҕа киинин дириэктэрэ Анастасия Габрашитова кэпсээтэ. – 2011 сыллаахтан итинник хайысхалаах үлэ саҕаланыҕыттан, чыыры үһүспүтүн ыыттыбыт. Чыыр, хатыыс, тууччах курдук күндү балыктары ыытыы, кинилэр үөскүүр сирдэрин харыстааһын – АЛРОСА айылҕа харыстабылыгар ыытар үлэтин биир тутаах хайысхата. Итинник үлэ көмөтүнэн Сахабыт сирин өрүстэригэр-күөллэригэр бултанар балык ахсаана-көрүҥэ чөлүгэр түһүө диэн эрэнэбит”.
Чыыры ыытыы – сыл аайы балыгы ыытар үлэ бастакы түһүмэҕэ. АЛРОСА экологтара аны бэс ыйын саҥатыгар Өлүөнэ өрүскэ тууччах, оттон күһүнүн Бүлүү өрүскэ 60 тыһыынча хатыыс ыаматын ыытыахтара.
АЛРОСА сыл аайы Саха сирин күөллэригэр балыгы үөскэтэргэ 10 мөлүйүөн солк. тыырар. Ихтиофаунаны чөлүгэр түһэрэр бырагырааманы таһынан, АЛРОСА сокуонунан олохтоммут толуйар булгуччулаах эбии ыытыылары оҥорор. Ол курдук, былырыын хампаанньа экологтара уонна Чернышевскайдааҕы балык собуотун үлэһиттэрэ Бүлүү водохранилищетыгар 3,9 мөл. быраҥаатта уонна Бүлүү өрүскэ 20 тыһыынча хатыыс ыаматын ыыппыттара.
