АЛРОСА Экологияҕа киинин дириэктэрэ Анастасия Габрашитова СОР30 анаммыт UN Global Compact Network Russia сиэссийэтин кэмигэр углероду кыччатыы тосхолун уонна сир баайын хостуур, кимберлит боруодатын таҥастыыр кэмҥэ углекислай гааһы (СО2) аҕыйатар килиимэт бырайыагын чахчы туһалаах былаанын олоххо киллэрэн эрэллэрин туһунан кэпсээтэ.
Анастасия Габрашитова этэринэн, 2025 с. АЛРОСА аан дойдуга оҥорон таһаарыытын түмүгэр итиэннэ алмааһы оҥорор кэмигэр салгыҥҥа таһаарар углекислай гааһынааҕар быдан элбэх углекислай гааһы атын ньыманан суох гынарын бастакынан бигэргэппит сир баайын хостуур тэрилтэ буолбут. Ону судургутук “хампаанньа айылҕаҕа таһаарар буортулаах углекислай гааһынааҕар салгынтан хас эмэ бүк элбэх углекислай гааһы ыраастыыр буолбут” диэн өйдүөххэ сөп.
Хампаанньа углекислай гааһы аҕыйатарга үлэлэспитэ хас да сыл буолла. Күн бүгүн АЛРОСА туһанар электро-эниэргийэтин хайа охсубут аҥаара чөлүгэр түһэр эниэргийэ источниктарын көмөтүнэн оҥоһуллар. Ол гынан баран, бу боппуруоска АЛРОСА 2021-2024 сс. Арассыыйа учуонайдарын кытта ыыппыт чинчийиилэрэ быһаарар суолталаммыттара. Ити алмаас уруудатын – кимберлит – “ыйыстар” уратытын туһунан этиллэр. Чопчулаатахха, кимберлит атмосфераттан углекислай гааһы оборон ылан баран, туох да куттала суох биир кэм “тутан сытар” айылгылаах боруода. Учуонайдар уонна АЛРОСА үлэһиттэрэ ити дьикти көстүүнү Саха сиригэр уонна Архангельскайга АЛРОСА сирдэриттэн хостоммут кимберлиттэри аан бастакытын киэҥ хабааннаахтык хонууга да, лабаратыарыйаҕа да чинчийдилэр, ааҕан-суоттаан көрдүлэр. Итини таһынан, аан бастакытын оҥорон таһаарыы кэмигэр төһө кээмэйдээх углекислай гаас “сиэнэрин” ааҕан таһаардылар – сылга 1 мөлүйүөнтэн тахса туонна СО2 эбит.
Чинчийиилэр көрдөрөллөрүнэн, кимберлит углекислай гааһы “ыйыстан” баран салгыҥҥа төттөрү таһаарбат, этэргэ дылы, үйэ саас тухары “тутан сытар” кэбиһэр эбит. Ол түмүгэр 2025 с. АЛРОСА айылҕаҕа төһө хоромньуну таһаарарын уонна онтон төһөтүн төттөрү толуйарын норуоттар икки ардыларынааҕы тутулуга суох аудитордар сыаналаан бигэргэппиттэр.
“Ити улахан ситиһиибитинэн киэн туттабыт. Аан дойдуга алмаас бырамыысыланнаһыгар АЛРОСА ылар өлүүтүн учуоттаатахха, ити Сир шарын хас үһүс алмааһа буолан тахсар”, – диэн Анастасия Габрашитова бэлиэтиир.
Анастасия Габрашитова этэринэн, салгыы кимберлит углекислай гааһы “ыйыстыытын” өссө күүһүрдэргэ анаммыт килиимэт бырайыагын олоххо киллэриэхтээхтэр. Бырайыак бастаан Мииринэй бырамыысыланнай түһүлгэлэриттэн саҕаланан баран, сыыйа кэҥээн иһиэхтээх. Ити барыта 2026 сылтан саҕаланыахтаах. Күүһэ-уоҕа сылга 25 тыһыынча кэриҥэ углероднай эдэнииссэ буолуон сөп.
Бу бырайыак Арассыыйаҕа ССS көрүҥнээх (ССS – углероду “ыйыстар” уонна “тутан сытар”) бастакы, оттон аан дойдуга биир бастакы бырайыак буолуон сөп.
kyym.ru
