Күн устата Саха сирин үгүс сирдэригэр ардах, күүстээх тыал уонна хаар күүтүллэр. Өрөспүүбүлүкэ соҕуруулуу-арҕаа, арҕаа, хотугулуу-арҕаа уонна соҕуруу өттүгэр хаардыаҕа. Халымаҕа түүн устата хаардыаҕа, күнүһүн аҕыйыаҕа, диэн «Якутия 24» ханаал Саха сиринээҕи гидрометеорология уонна айылҕаны кэтиир управлениетын иһитиннэриитигэр олоҕуран биллэрэр.
Арыый тыаллаах буолара күүтүллэр, ол эрэн сорох сирдэринэн күүһүрэр. Халымаҕа түүн тыал күүһэ сөкүүндэҕэ 15–20 миэтэрэҕэ, арктика кытылыгар 16–21 миэтэрэҕэ тиийиэҕэ, бу сирдэргэ буурҕа түһэрэ күүтүллэр.
Салгын түүн -12... –17 кыраадыс тымныы буолуоҕа, хаар түспүт сиригэр — -7... –12, халлаан ырааһырдаҕына — -17... –22 кыраадыс тымныы. Хотугулуу-илин өттүгэр – 23... –28 кыраадыска дылы тымныйыаҕа, Өймөкөөн уонна Үөһээ Дьааҥы улуустарыгар — -30... –35 кыраадыс тымныы буолуоҕа.
Күнүс термометр көрдөрүүтэ 0... -5 кыраадыс. Соҕуруулуу-илин уонна соҕуруу өттүгэр 0... +5 кыраадыска дылы сылыйыаҕа. Хотугулуу-арҕаа уонна Халыма өттүгэр — -8... -13 кыраадыс, Анаабыр уонна Булуҥ улуустарыгар — -17... -22 кыраадыс тымныы күүтүллэр.
Хаартыска: Майя Дмитриева / "Якутия 24"
