Быйыл Саха сиригэр халаан уута эрдэлээн кэлиэн сөп. Муус харыан сөптөөх 59 сирин быһаарбыттар. Бу күннэргэ бэрэсидьиэн Уһук Илиҥҥэ боломуочуйалаах бэрэстэбиитэлэ Юрий Трутнев Уһук Илин сэбиэтин мунньаҕын тэрийдэ. Сүрүннээн сааскы халаан уонна сайыҥҥы баһаардар тустарынан кэпсэттилэр. Биллэн турар, Саха сирэ болҕомто киинигэр буолла. 59 муус харыан сөптөөх сирдэрин күнүстэри-түүннэри кэтииргэ соруйда.
Ил Дархан Айсен Николаев өрөспүүбүлүкэ күүһэ-күдэҕэ барыта бэлэмин туһунан эттэ: “Ити боппуруоһу күүскэ хонтуруоллуубут. Тоҕо диэтэххэ, ол барыта дьон олоҕун уонна инфраструктураны кытта быһаччы ситимнээх. МЧС-тары уонна федеральнай структуралары кытта дьылы этэҥҥэ туоруур туһугар барытын оҥоруохпут”.
Гидромет-киин кэлиҥҥи сылыктааһынынан, быйыл өрүстэрбит 3—5 күн эрдэлээн эстиэхтэрин сөп. Уу муҥутаан Дьааҥыга, Халымаҕа, Алаһыайга, Индигииргэ, ону тэҥэ Марха уонна Майда өрүстэргэ кэлиэн сөп. Харбыт өрүстэр муустарын хамсатарга барыта 25 туонна дэлби тэбэр бэссэстибэни хаһаанан тураллар.
