Бу күннэргэ Саха сиригэр халлаан нуорматтан биллэ тымныйыаҕа. Киин уонна арҕааҥҥы улуустарга түүнүн хаһыҥныан, хоту – инчэҕэй хаар түһүөн сөп. Ол туһунан Гидрометкиин Саха сиринээҕи салаатын салайааччытын солбуйааччы Татьяна Маршалик кэпсээтэ.
“Тымныы буолбатах буоллаҕына, олус сөрүүн буолуоҕа. Билигин киин улуустарынан тымныы салгын балаһата ааһан эрэр. Ардах хотугулуу-илиҥҥи улуустарга, илин эҥээргэ, Уус Майдаҕа, Томпоҕо уонна Халыма-Индигиир сүнньүгэр көстө. Дьааҥыга улахан ардах бүттэ”, – диир синоптик.
Кини этэринэн, бу бастакы атмосфернай балаһа кэннэ иккис тымныы салгын балаһата иһэр, ол Бүлүү сүнньүн эмиэ таарыйыахтаах.
“Температура ортотунан 15, сорох сиргэ инньэ 20 кыраадыһынан тымныйда. Сэрэдэҕэ уонна чэппиэргэ Саха сиригэр барытыгар олус тымныы буолуоҕа”, – диир Татьяна Маршалик.
Тымныы салгын балаһатын кэннэ антициклон кэлиэҕэ, онтон сылтаан түүҥҥү өттүгэр хаһыҥныан сөп.
“Киин уонна арҕааҥҥы улуустарга түүнүн хаһыҥныан сөп. Түүнүн 0...+5 кыраадыс эрэ буолара сабаҕаланар. Хаһыҥтан арай бу күннэрдээҕи ардах кэннэ сиигирбит буор эрэ быыһыан сөп”, – диэн Маршалик быһаарар.
Бу күннэргэ саамай күүстээх тымныы сэрэдэҕэ түһүөҕэ. Дьокуускайга уонна киин улуустарга күнүһүн +14...+16 кыраадыс буолара күүтүллэр. Аны туран, тымныы салгын балаһата аастаҕына, кыралаан ардыан, хотугу улуустарга хаардыан сөп.
Тымныы халлаан өр туруо суоҕа, бээтинсэттэн саҕалаан кыралаан көннөрөн бырыа. Өрөбүллэргэ күнүһүн +20...+25 кыраадыс сылаас буолуоҕа.
