Ойуур баһаардарын утары дьаныардаах үлэ тохтообот. ЫБМ исписэлиистэрэ уонна уоту кытта охсуһааччылар күнүстэри-түүннэри уоту хаайа туталлар.
Бүгүҥҥү сарсыардааҥҥы иһитиннэриинэн, 11 улуус сиригэр 73 ойуур баһаара умайа сытара бэлиэтэнэр. Уопсайа 982 774,5 гектар сир уокка былдьаммыта ааҕылынна, онтон 1 474,2 гектарга өссө да күөдэпчилэнэ, көрдүгэннии сытара суруллар. Бэҕэһээҥҥи күн устата уоту утары охсуһааччылар икки баһаары умуруорбуттар эрээри, ол оннугар икки саҥа уот эбии күөдьүйэн тахсыбыт. Итиэннэ иэннэрэ 13 535,5 га-ҕа тиийэ тэнийбит.
Күн бүгүн бу уоту барытын утары 594 киһи уонна 72 тиэхиньикэ үлэлиирэ бэлиэтэнэр. Онуоха ураты болҕомто Өлөөн улууһугар Эйиккэ ууруллар. Манна 130 киһи уонна 17 тиэхиньикэ күн аайы уоту кэтээн көрөллөр, хаайаллар. Бу дьаһал түмүгүнэн, билигин нэһилиэк уокка былдьанар куттала суоһаабат. Айылҕа бэйэтэ да көмөлөһөр курдук, ол эбэтэр нэһилиэк биир өттүнэн улахан күөл уоту хаайан сытар.
Бэлиэтэээн эттэххэ, өрөспүүбүлүкэҕэ билиҥҥитэ биир да нэһилиэнньэлээх пууҥҥа уот куттала суоһаабат диэн ЫБМ иһитиннэрэр.
Бэй.кэр.
Хаартыска: ЫБМ СӨ салалтатын саайтыттан.
