Атырдьах ыйын 18 күнүгэр “Арассыыйа уута” диэн бүтүн Арассыыйатааҕы аахсыйа сүрүн тэрээһинэ ыытыллыаҕа – бар дьон Өлүөнэ эбэ кытылын бөҕүн-саҕын ыраастыы тахсыаҕа.
Саха сирэ бу эко-аахсыйаны сылын аайы олус далааһыннаахтык ыытар. Былырын өрөспүүбүлүкэ “Муҥур элбэх хомуллубут бөх” диэн федеральнай куонкурска “муҥутуур чөмпүйүөн” буолбута. Ол курдук, Таатта улууһун Чычымаҕын орто оскуолатын хамаандата Амма өрүс кытылын ыбылы ыраастаабыта. Онон, дьүүллүүр сүбэ оҕолор кыһамньыларын үрдүктүк сыаналаан, “Арассыыйа уута” бэстибээл сүрүн тэрээһинин 2026 сылга ыытар быраабы өрөспүүбүлүкэҕэ биэрбитэ.
Аахсыйа кэмигэр РФ Айылҕа баайыгар уонна экологияҕа миниистирэ Максим Корольков видео-эҕэрдэтэ көстүөҕэ. Аны, бу тэрээһиҥҥэ Ил Дархан Айсен Николаев уонна Дьокуускай мээрэ Дмитрий Садовников кыттыһыахтара.
Оттон муҥур элбэх бөҕү хомуйуу күөн күрэһигэр биллэр ырыаһыт Эркээнэ Алмаас уонна Тыгын оонньууларын биэс төгүллээх кыайыылааҕа, ааттаах-суоллаах спортсмен Егор Филиппов кыттыахтара. Ырыаһыт саха ылбаҕай ырыаларынан аахсыйаны киэргэтиэҕэ.
Бу аахсыйаҕа Дьокуускай куорат бары олохтоохторун уонна ыалдьыттарын ыҥыраллар. Ким Өлүөнэ эбэбитин ыраас уонна чэбдик эйгэлээх оҥоруон баҕалаах берегдобрыхдел.рф (https://clck.ru/3VBcTy) саайтка киирэн суруйтарыан наада. Оттон үлэҕэ-хамнаска наадалааҕынан миэстэтигэр волонтердар хааччыйыахтара.
Тэрээһин атырдьах ыйын 18 күнүгэр, 08.30 – 12.00 ч. диэри ыытыллыаҕа, дьон тоҕуоруһар сирэ – Дьокуускай куорат кытыла (Набережнай).
Ыспыраапка
“Арассыыйа уута” аахсыйа – “Чэбдик экология” (Экологическое благополучие) национальнай тосхол “Арассыыйа уута” диэн федеральнай барыл иитинэн 2014 сылтан ыытыллар. Бу кэм устата Арассыйа бары эрэгийиэннэригэр 13,2 мөл. киһи кытынна. Былырыын Саха сирэ уон саамай көхтөөх эрэгийиэн ахсааныгар киирбитэ, о.э. аахсыйаҕа 55 тыһ. киһи кыттыбыта.
Бэй.кэр.
Хаартыска: Kyym.ru
MAX ханаалбытыгар кыттыһаргытыгар ыҥырабыт, өссө элбэх сахалыы сонуннар күүтэллэр: https://max.ru/join/db9mNXa521xrlrCKpuR1giif2-TeEMK9592hLc0ABcU
