«Бүгүн өрөспүүбүлүкэ ууларыгар Сибиир хатыыһын мөлүйүөн аҥара ахсааннаах ыамата ыытылынна. Кинилэр искэхтэрин Кэбээйи улууһугар хомуйбуттара, онтон Улахан-Аан балык сыаҕар иитэн таһаардылар. Даҕатан эттэххэ, Саха сирин үрдүнэн өрүстэргэ 30 мөлүйүөнтэн тахса балык ыамата ыытылынна. Урукку өттүгэр бу үлэни судаарыстыба эрэ үбүлүүр эбит буоллаҕына, билигин бырамыысыланнас хампаанньалара улахан көмөнү уураллара ордук суолталаах. Кинилэр сири-уоту туһаныыга айылҕаҕа оҥорор хоромньуларын толуйаллар. Ол курдук, бүгүҥҥү Сибиир хатыыһын ыаматын ыытыыны «Газпром» хампаанньа үбүлээтэ. Бырамыысыланнай тэрилтэлэр айылҕа тыыннаах баайын чөлүгэр түһэриигэ угар үбүлээһиннэрэ номнуо сүүһүнэн мөлүйүөнүнэн ааҕыллар», – диэн тэрээһин кэмигэр СӨ Ил Дархана Айсен Николаев бэлиэтээтэ.
СӨ Экологияҕа, айылҕаны туһаныыга уонна ойуур хаһаайыстыбатыгар миниистирэ Евгений Перфильев иһитиннэрбитинэн, өрөспүүбүлүкэҕэ уулары балыгынан хааччыйыы үлэтэ ситимнээхтик салҕанан бара турар. Бу сылга өрүстэргэ уопсайа 26 мөлүйүөн үрүҥ балык көрүҥнэрин ыаматын, ону кытта 500 тыһыынчаттан тахса чыыр ыытыллыбыт. Кэлэр сылга 100 мөлүйүөҥҥэ чугаһыыр балык ыаматын ыытар былаан баарын кэпсээтэ, онтон 1 мөлүйүөнүн ураты сыаналаах хатыыс ылыахтара», – диэн бэлиэтээтэ.
