Атырдьах ыйын 25 күнүгэр АЛРОСА Экологияҕа киинэ Чернышевскайдааҕы балык собуотун кытта Бүлүү өрүскэ 30 тыһыынча хатыыһы ыыппытын туһунан хампаанньа пресс-сулууспата суруйар. Тэрээһин Кириэстээх сэлиэнньэтин таһынааҕы Соколинай тоҕойугар буолан ааспыт. Онон АЛРОСА 2026 с. балыгы ыытар бырагырааматын түмүктээбит.
Хампаанньа күндү балыгы харыстыыр, арааһын элбэтэр уонна чөлүгэр түһэрэр сыаллаах Саха сирин күөллэригэр сыл аайы балыгы ыытар.
Бу ыыппыт хатыыстарын Чернышевскайдааҕы балык собуотугар иитэн, үөскэтэн таһаарбыттар. Балыгы көҥүл ыытыахтарын иннинэ тыыннаах айылҕа усулуобуйатыгар сыыйа үөрэппиттэр: биэс күн устата балык сылдьар уутун температуратын +18 кыраадыстан +11 кыраадыска диэри түһэрбиттэр. Онон балык оҕолоро эрдэттэн үөрэнэн, көҥүл барарга бэлэм буолбуттар. Түмүгэр барыта 30 киилэ курдук ыйааһыннаах 30 тыһыынча хатыыс оҕотун Бүлүү эбэҕэ ыыттылар.
“АЛРОСА Саха сиригэр биология ресурсаларын харыстыыр уонна чөлүгэр түһэрэр тэрээһинэ – өр сыллаах уонна тиһиктээх үлэ. Билигин биһиги Бүлүү өрүскэ 30 тыһыынча хатыыс оҕотун ыыттыбыт. Ол Саха сирин күөллэригэр-өрүстэригэр күндү балык ахсаанын хаҥатарга өссө биир дьоһун хардыы буолла, – диэн АЛРОСА Экологияҕа киинин салайааччыта Анастасия Габрашитова кэпсиир. – Өрүстэрбитигэр балыкпыт ахсаанын хаҥатарбыт кэскиллээх дьыала. Хатыыс тыыннаах айылҕа био-индикатора буолар. Кини туругуттан көрөн тулалыыр эйгэ туругун сыаналыахха сөп”.
Мантан салгыы быыкайкаан хатыыстар тыыннах айылҕаҕа үүнүөхтээхтэр-сайдыахтаахтар. Олор бултанар-балыктанар буолуохтарыгар диэри өссө сэттэ-тоҕус сыл ирдэнэр.
Балыгы үөскэтэн ыытар тэрээһин – АЛРОСА экологияҕа анаммыт биир тутаах хайысхата. Хампаанньа айылҕа харыстабылыгар сыһыаннаах тэрээһиннэрин “Экологияҕа куттал суох буолуута уонна тулалыыр эйгэ харыстабыла” кэлим бырагыраама чэрчитинэн ыытар. Ол иһигэр күөллэргэ-өрүстэргэ балык ахсаанын чөлүгэр түһэрэр, кыыл табаны кэтиир уонна харыстыыр, ону сэргэ Кыһыл кинигэҕэ киирбит көтөрдөрү харыстыыр тэрээһиннээх.
2026 сыллааха АЛРОСА хампаанньа харчытынан уу биологическай ресурсаларын чөлүгэр түһэрии чэрчитинэн, Бүлүү өрүскэ барыта 1,7 мөлүйүөн араас күндү балык ыамата уонна үөскэҕэ ыытыллыбыта. Ону таһынан, толуйар тэрээһин сүнньүнэн Бүлүү муоратыгар 480 тыһыынча кэриҥэ быраҥаатта ыаматын ыыппыттара. Оттон ааспыт 15 сыл иһигэр барыта 35 мөлүйүөн кэриҥэ балык ыамата үөскэтиллэн көҥүл ыытылынна.
Итинник тэрээһиннэр өр кэмнээх, хас эмэ сыллаах буолаллара АЛРОСА-ҕа олус суолталаах. Ол иһин хампаанньа балык, билим тэрилтэлэрин, судаарыстыба уорганнарын кытта мэлдьи бииргэ үлэлэһэр.
Сонун "Алмазный-край.рф" саайтан тылбаастанна.
