Саха сиригэр ахсынньы 15 күнүттэн тайаҕы, таҥара табатын, туртаһы уонна дьиикэй табаны бултааһын болдьоҕо түмүктэниэҕэ. Бу туһунан экология министиэристибэтэ сэрэтэр.
“Маныаха быйыл таҥара уонна дьиикэй табаны, туртаһы уонна тайаҕы бултааһын болдьоҕор маннык улуустарга хааччахтар бааллар: Амма улууһугар – алтынньы 1 – сэтинньи 20 күнүгэр диэри, Горнайга – алтынньы 1 күнүттэн ахсынньы 1 күнүгэр диэри, Нам улууһугар – алтынньы 1 – сэтинньи 15 күнүгэр, оттон Хаҥаласка – алтынньы 1 күнүттэн сэтинньи 10 күнүгэр диэри”, — диэн министиэристибэ иһитиннэрэр.
Маны сэргэ, министиэристибэ булчуттарга булт болдьоҕо бүппүтүн кэннэ уон күн иһигэр ылыллыбыт көҥүлү төннөрөллөрүгэр санатар. Өскөтүн төннөрбөт түгэннэригэр административнай миэрэҕэ тардыллыахтарын туһунан өссө төгүл сэрэтэр.
