Мииринэй оройуонугар промышленность уонна геология сайдан, аар тайҕа энчирээтэ, эһиннэ диэтэхпинэ бука сыыспатым буолуо. Тыа быыһа бүтэтэ суох лисиэнсийэлээх учаастактар, боруопуллар, технологическай хабааннаах суоллар...
Хаһан эрэ уу-чуумпу турбут тайҕаны, ойууру солуур, тэпсэр тиэхиньикэ киһи куйахатын тырыыппайдыыр тыаһынан аймыыр. Кыыл-сүөл, көтөр-сүүрэр өлөргө, сүтэргэ барда. Эбэтэр мэнээк айбардыыллар. Дэлэҕэ, Мииринэй 13 км аттыгар эһэлэр ордууланыахтара дуо? Мииринэй сыбаалкатыттан саһыллар арахпаттар.
Тус бэйэм Комсомуол уулуссатын 25-с №-дээх дьиэтин аттынааҕы хатыҥнарга тииҥ сылдьарын көрбүтүм. Аны сотору-сотору куораппыт киинигэр хахханы көрөр буоллум. Безымяннай үрүйэ үрдүнээҕи тииттэргэ олорорун көрбүттэр этэ. Онно сыбаалка арааһа баар. Бу туохтан сэдиптэнэрэ чуолкай. Маанылаах көтөрдөр аар-хара тыаттан астара бүтэн, энчирээн куоракка күрэнэллэр. Куорат бөҕүттэн, оргулуттан ас тобоҕун үссэнэллэр.
Станислав Алексеев, Мииринэй к.
