Ил Дархан Айсен Николаев уурааҕынан атыыр улары уонна куртуйаҕы бултааһын сааскы кэмҥэ бобуллан турар. Онтон атын көтөргө булт ыам ыйыттан саҕаланыа.
Сааскы булт болдьоҕо үгүс улууска оннунан хаалла. Ол курдук киин улуустарга куска ыам ыйын 11 күнүттэн саҕалаан тахсыахтара. Оттон Бүлүү бөлөх булчуттара үс хонугунан хойутаан, ыам ыйын 14 күнүгэр сааланыахтара.
Бу сылга аҕыйах ахсааннаах кыылы харыстыыр соруктаах анал сокуон барыла оҥоһулунна. Ол курдук Кыһыл кинигэҕэ киирбит кыылы сокуоннайа суох бултаабыт дьону буруйга тардыыны күүһүрдэн биэриэхтэрэ. “Элбэх буолан кыттыһан кыылы бултааһын” диэн өйдөбүл киирэн биэриэҕэ. Манна аҕыс сылга тиийэ көҥүл быһыллыан сөп.
Билигин Саха сирин Кыһыл кинигэтигэр 100-тэн тахса кыыл киирэ сылдьар. Эспиэрдэр этэллэринэн, браконьердар биир бултааһыҥҥа 100-тэн тахса мөлүйүөҥҥэ тиийэ хоромньуну таһаараллар. Онон билигин үлэлиир сокуон бу хоромньу ороскуотун ырааҕынан саппат.
