РФ ыксаллаах быһыыга-майгыга министиэристибэтин Саха сиринээҕи салаатыгар быыһыыр бөлөхтөр бэлэмнэрин көрдүлэр. Халаан уутун кэмигэр ыксаллаах быһыыга-майгыга быыһааччылар 11 бөлөҕө үлэлииргэ бэлэм. Бөлөхтөр ортотунан 15-тии киһилээхтэр.
РФ ыксаллаах быһыыга-майгыга министиэристибэтин Саха сиринээҕи салаатын начаалынньыга Павел Гарин маннык кэпсиир: “24 оройуоҥҥа (133 нэһилиэнньэ) куттал баар. Гидрометцентр билгэлииринэн Халымаҕа уонна Илин Эҥэр улуустарыгар ыарахан балаһыанньа буолуон сөп”.
Быыһааччылар бөлөхтөрүн суһал ыҥырыыга бэлэмнэрин бэрэбиэркэлээтилэр. Ол курдук, туттар тэриллэрин, тиэхиньикэлэрин көрдүлэр. “Халымаҕа икки бөлөх барыа. Ону таһынан, Өлүөнэ, Алдан, Амма өрүстэргэ тоҕус бөлөх үлэлиэҕэ. Муус этэҥҥэ аастаҕына бөлөхтөр салгыы Халымаҕа үлэлиэхтэрэ”, – диэн Павел Гарин иһитинэрэр.
Ону таһынан, өрүс харыытыгар эстэрэр түөрт хамаанда үлэлиэҕэ. Манна 120 туонна эстэрэр бэссэстибэ оҥоһуллар. Халаан уутун хонтуруоллаһын үс түһүмэҕинэн ыытыллар. Бастаан Өлүөнэ Эбэҕэ онтон Амма, Алдан уонна Бүлүү өрүстэригэр. Ол кэнниттэн Халыма, Яна уонна Индигирка өрүстэригэр. Онтон сайыҥҥы хара уу кэлиитин өрөспүүбүлүкэ киин оройуоннарыгар кэтээн көрүөхтэрэ. Ону таһынан, Уһук Илин уокуруктан ыам ыйыгар 30 быыһааччы көмөҕө кэлиэҕэ. Дьокуускайга, Хаҥаласка уонна Намҥа үлэлиэхтэрэ.
