Бүлүүчээн үрэҕэ: Сир баайын көрдөөччүлэр буулаабыт үрэхтэрэ

Бүлүүчээн үрэҕэр бу күннэргэ, дохсун ардахтар кэннилэриттэн, хара тыатыттан ылата уунан килэйэн турар. Бу — улахан үрэх.

Ол эрээри үрэххэ балыктыырга санаммаккын даҕаны. Манна, бэл күстэх, алыһар  мэлигир.Үрдүк мындаа хайаларын сэндэҥэ тыатыгар, систэригэр, томтордоругар,  улар, куртуйах, ыалыкы буолуохтааҕар бөчүгүрэс да суох. Бэл чыычаах ыллаабат. Арай, дьон хаалларбыт бөҕүн тиҥсирийэр хара суор халаатыыр.Хаһан эрэ, баай бултаах, дэлэй балыктаах маанылаах үрэххэ үйэ аҥаарын устата сир баайыгар чинчийиллэр. Үрэх хочото - сейсморазведка сирдэрэ, бүттэтэ суох боруопуллар.Балык  Бүлүү өрүс киртийиэҕиттэн ылата, кэхтибитэ ыраатта. 

Былыр, Бүлүүчээн үрэҕин, бил, туут балык, быйыт өксөйөр ахан этилэр.Ол билигин кэпсээҥҥэ, номоххо эрэ хааллаҕа. 
Оттон билигин үрэх уутун ылар баранар баһыттан,  гааһы-ньиэби көрдөөччүлэр арахпаттар. Үөһээ Дьэрбэ ньиэптээх-гаастаах сирин таба тайананнар, тайҕаҕа дьон толору.Ленскэй диэкиттэн кэлэллэр. Бүлүүчээн баһа —тиэхиньикэ, кимнэрэ-туохтара биллибэт дьон вездеходынан сыбыытыыр сирдэригэр кубулуйда. Билигин ол диэки ким да бултаабат.Оттон алын тардыытыгар, бэл, сир да астаабат.  Хара тыатыгар уулаах отон, киис тиҥилэҕэ, моонньоҕон урукку курдук сигириччи  үүммэт буолан турар. Барытын Мииринэй куораттан тахсар дьон,  уктары-баҕастары тоҕута тардыталаан, үлтү тэпсэн, сир аһа дьөрү үүммэт гынан тураллар. 
Сити курдук ыар суолланнылар, хаарыаннаахай үрэхтэрбит, дьүүктэлэрбит, күөллэрбит, элгээннэрбит!

Станислав Алексеев. Мииринэй куората. Ааптар хаартыскалара.