Тулалыыр эйгэни харыстааһыҥҥа уопсастыбаннай инспектор Сергей Землянскай ыҥырыытынан, Хаҥалас улууһун олохтоохторо туртастары эбии аһаталлар. Бу туһунан экология министиэристибэтин пресс-сулууспата иһитиннэрэр.
Ол курдук, Сергей Землянскай улуустааҕы хаһыакка уонна социальнай ситимҥэ туртас популяциятын харыстыырга ыҥырыы таһаарбыта. “Күһүн уһаан, халлааммыт эмискэ тымныйан онтон ириэрэн, туртастар хаар анныттан хаһан аһыылларыгар ыарахаттардаах буолла. Бу кыыллар өлөр кутталланнылар. Инньэ гынан, эбиэһинэн, туорааҕынан, отунан эбии аһатыахха”, – диэн иһитиннэриигэ суруллар.
Бу күннэргэ Хаҥалас улууһун булчуттарын бөлөҕө туртастары эбии аһаттылар. Сергей Землянскай иһитиннэрбитинэн, эр дьон тыаҕа туртастарга аналлаах аһыыр сирдэри оҥорбуттар онно эбиэс, туус уонна от хаалларбыттар.
Кини кэпсииринэн өссө биир бөлөх уопсастыбаннай инспектор Артем Владимировы кытта маннык аһыыр сирдэри оҥорбуттар. Оттон инспектордар бу оҥоһуллубут сирдэри кэтээн көрүөхтэрэ, эбии эбиэс, от ууран биэриэхтэрэ. Ону таһынан, атын сирдэргэ эмиэ оҥорор былааннаахтар.
