Быйыл кыһын арҕаа эҥээргэ сылаас, үрэхтэргэ, дүөдэлэргэ, марахаларга хаһыыта үчүгэй буолан, сылгыларга куһаҕана суох диир оруннаах буолуо.
Арыылаах сэлиэнньэтин сылгыһыттара бөрө буулууруттан эрэйдэммиттэрэ ыраатта. Анаан-минээн бултаһар дьон аҕыйаан иһэллэр. Урут Павел Алексеев доҕотторун кытта буранынан сылдьан, бөрөлөрү бултаан чугаһаппат буола сылдьыбыттара. Оҕонньор кырдьан урукку курдук тыаҕа сылдьыбат.
Былырыын икки атахтаах сойуоласпатын билбит ардай аһыылаахтар, Арыылаах сэлиэнньэтин чугастааҕы ходуһаларыгар кытары сундулуспуттара.
89 саастаах Алексей Григорьев, Владимир Семенов кырдьаҕастар сылгыларын тардыбыттара. Алексей Григорьев биэс сылгытын бөрөлөр тардан, сиэн-аһаан, улахан ороскуокка баран, олохтоох дьаһалтаҕа кытары көрдөһөргө күһэллибитэ. Онно күттүөннээх көмө оҥоһуллубута көстүбэт. Аны анаҕастаахтар Сунтаар улууһун Кириэстээх нэһилиэгин дьонун сылгыларын, тэйиччи от үрэхтэргэ талбыттарынан кэбилээтилэр. Биир үөр бөрө Холоруктаах, Даҕанда, Сантай, Туостаах үрэхтэр тардыыларыгар айбардыыр. Олору уодьуганныырга эмиэ кыах тиийбэт. Бөрөлөр Сунтаар диэки Нэлээтинэн Кыра, Улахан Өлөҥ үрэхтэриттэн тиийэллэр. Оттон Мииринэйтэн сэттэ көс ыраах Заря бөһүөлэгин тула быраҕыллыбыт сыбаалкаларга бөрө ийэтэ-аҕата субуллар. Бэйдиэ сылдьар ыттары туталлар. Онон дьоҥҥо да кутталланан тураллар.
Станислав Алексеев, Мииринэй куората.
