Олунньу 29 күнүгэр Нам улууһугар, экологическай кэтээн көрүү Саха сиринээҕи кэмитиэтин инспектэрдэрэ уонна сылгыһыттар, булчуттар бөрөлөрү бултаатылар. Бу туһунан СӨ экология министиэристибэтин пресс-сулууспата иһитиннэрэр.
Биэдэмистибэ үлэһиттэрэ бэлиэтииллэринэн, флажоктаах бөрөлөрү бултааһын биир саамай көдьүүстээх уонна тарҕаммыт ньыма буолар. Сылгыһыттар Бөтүҥ нэһилиэгин аттынан бөрөлөр суолларын булбуттар. Бөрөлөр 5-7 сылгыны тутан хоромньу бөҕөтүн таһаарбыттар. Инньэ гынан, бөрөлөр сылдьар сирдэрин флажоктарынан бэлиэтээн, үүрээччилэр уонна ытааччылар бөлөхтөрүн тэрийэн бултаабыттар. Ол түмүгэр үс бөрөнү өлөрбүттэр, икки бөрөнү эчэппиттэр, ол да буоллар, 2-3 бөрө тыыннаах хаалбыт.