Үөһээ Дьааҥы улууһун Сартаҥ, Сыһыы Мэйиитин чугастарыгар бөрө элбэҕин туһунан кэпсэтиилэр бу күһүҥүттэн бааллара, чуолкайын ким да билбэт быһыылааҕа. Саас чугаһаан истэҕин аайы бөрө элбээн иһэр, сорохторо ити нэһилиэктэртэн чугас кыстаабыттар, сорохторо Нэлгэһэ диэкиттэн кэлбиттэр. Балар билиҥҥитэ 10 улахан уонна кыра сылгыны тардыбыттар. Сиэҥнэргэ булчуттар дьааты уонна сылдьыахтара диэбит сирдэригэр хапкааннары уурбуттар.
Билиҥҥитэ Прокопий Егорович Слепцов уолунаан Спиридоннуун үс, ини-бии Николай Егорович уонна Егор Егорович Слепцовтар, Ньургун Григорьевич Алексеев биирдии бөрөнү бултаабыттар. Өссө биир бөрөнү Борис Владимирович Потапов Тарҕанаттан Сартаҥҥа айаннаан иһэн бултуйбут. Бу чахчылар тустарынан биһиэхэ нэһилиэк баһылыгын солбуйааччы Руслан Бойко төлөпүөнүнэн иһитиннэрдэ. Руслан Николаевич этэринэн, билигин да Хаастыыр таһыгар, Хороту аттыгар бөрө үөрдэрэ, Сыһыы Мэйиититтэн чугас соҕотохтуу сылдьар бөрөлөр бааллар.
Иннокентий Кысылбаиков, ulus.media/
