Быйыл баһаары утары үлэҕэ федеральнай уонна өрөспүүбүлүкэтээҕи бүддьүөттэн 1,3 млрд солк тахса үп көрүллүөҕэ.
“2020 сылга өрөспүүбүлүкэтээҕи бүддьүөттэн 381 мөл солк, федеральнайтан 964 мөл солк үп көрүллүннэ. Баһаардары умулларыыга олохтоох бүддьүөттэн 110 мөл солк, кэтээн көрүү, үөрэтии үлэтигэр 129 мөл солк үп туттуллуоҕа", – диэн СӨ экология министиэристибэтин пресс-сулууспата иһитиннэрэр.
Ааспыт сылга Ил Дархан Айсен Николаев ойуур баһаарын утары үлэҕэ эбии үбүлээһин ирдэнэрин туһунан эппитэ. Ол курдук “Авиалесоохрананы” үбүлээһиҥҥэ 270 мөл солк буолбакка, 500-600 мөл солк ирдэнэрин бэлиэтээбитэ.
Экология министиэристибэтин көрдөрүүтүнэн, ааспыт сылга ойуур пуондатыгар тахсыбыт хоромньу уопсай суумата 463 мөл солк тэҥнэспит.
Быйыл Сибиир эрэгийиэннэригэр баһаар кэмэ ыарахан буолара сабаҕаланар. Ол туһунан Рослесхоз баһылыга Сергей Аноприенко иһитиннэрэр.
yakutia24.ru/
