Уус Алдан уонна Хаҥалас улуустарыгар уопсайа 5,5 га иэнээх сиргэ тахсыбыт ойуур баһаарын умуордулар. Бу туһунан СӨ экология министиэристибэтин пресс-сулууспата иһитиннэрэр.
Ыам ыйын 19 күнүнээҕи көрдөрүүнэн, Аммаҕа уонна Чурапчыга уопсайа 10 га иэннээх ойуур баһаара умуоруллубут.
Баһаардары умуорууга ойуур харыстабылын сулууспатын 23 үлэһитэ, ЫБММ биир үлэһитэ уонна үс тиэхиньикэ үлэлээбиттэр.
Номнуо биэс ойуур баһаара бэлиэтэммит. Экология министиэристибэтэ өрөспүүбүлүкэ олохтоохторун уонна ыалдьыттарын, ойуурга баһаар барбатын курдук сэрэхтээхтик сылдьалларыгар уонна бары ирдэбиллэри тутуһалларыгар ыҥырар.
Өскөтүн ойуурга баһаар барбытын көрбүт буоллаххына, 8-4112-44-74-76 эбэтэр 8-800-100-94-00 эрийэн биллэр.
