Аан дойду барытын үрдүнэн улахан сылыйыы бара турарын, онтон сылтаан аан дойду олоҕо барыта атыйахтаах уулуу айманыан сөбүттэн, арааһа, биһиэхэ Арассыыйаҕа эрэ улаханнык долгуйбаппыт быһыылаах.
РНА Уһук Илиннээҕи салаатын география билимигэр Чуумпу Байҕаллааҕы институтун үлэһитэ Сергей Давыдов санаатын үллэстэр. Кини “Арассыыйа сирин-уотун 10 %-на мөлүйүөнүнэн сыллары быһа ууллубакка турар ирбэт тоҥ үрдүгэр сытар. Ол муус ууллан истэҕин аайы, былыр үйэҕэ хам тоҥон сыппыт былыргы буортулаах да, буортута суох да вирустар тахсан кэлиэхтэрин сөп. Холобур, уонунан тыһыынча сыл анаара өттүгэр өлөн баран ирбэт тоҥҥо сыппыт сэлиилэр (мамоннар) өлүктэриттэн сотуун ыарыы (сибирская язва) вирустара көстүбүттэрэ. Син ол курдук, ирбэт тоҥ ирдэҕинэ хара уоспа уо.д.а. курдук киһи аймахха кутталлаах ыарыылар тиллэн “көҥүлгэ көтүөхтэрин” сөп. Ол иһин аныгы билим былыр киһи аймахха туран ааспыт улахан, кутталлаах ыарыылары-хамсыктары өссө төгүл төхтүрүйэн үөрэтиэн, сиһилии билиэн наада” диир.
