Бу сыл аҥаарын иһигэр айылҕаны буортулаабыттарын түмүгэр барыта холбоон 40-тан тахса мөлүйүөн солкуобайдаах хоромньу оҥоһуллубут. Ол туһунан Ил Дархан уонна бырабыыталыстыба дьаһалтата суруйар.
Атырдьах ыйын 17 күнүгэр бырабыыталыстыба бэрэссэдээтэлин э.т. Андрей Тарасенко Ил Дархан экологияҕа сыһыаннаах ыйааҕа төһө туолан иһирин ырытта.
“2020 сыл бастакы аҥаарыгар 7,9 мөл. солкуобай суумалаах 159 ыйыы (предписание) уонна 1131 административнай ыстараап сурулунна, 33,8 мөл. солкуобай суумалаах хоромньуну толуйар ирдэбил түстэ”, -- диэн кини бырабыыталыстыба мунньаҕар кэпсээтэ.
Тарасенко этэринэн, “Экология” национальнай бырайыак үлэтэ-хамнаһа аҥаардас кэтээн көрүүнэн эрэ муҥурданыа суохтаах. Сир баайын хостуур тэрилтэлэри кытта тулалыыр эйгэҕэ куттал суоһаабат саҥа сирдэрэ тэриллиэхтээхтэр.
Мунньахха этиллибитинэн, Саха сиригэр үлэлиир сир баайын хостуур тэрилтэлэр барыта холбоон 11,7 млрд солк. суумалаах айылҕаҕа куттал суоһаабатын хааччыйар бырагыраамалары үлэлэтэллэр.
