Үс улууска ойуур уотун ыытыыга уорбалаан, 4 киһиэхэ холуобунай дьыаланы тэрийдилэр. Бу туһунан ЫБММ Саха сиринээҕи салаатын пресс-сулууспата иһитиннэрэр.
Кинилэр суруйалларынан, күн бүгүн Госпожнадзор дознователлэрэ ойуур уотун таһаарыыга сыһыаннаах 17 киһини булбуттар, 9 киһиэхэ административнай ыстыраабы суруйбуттар.
“Процессуальнай бэрэбиэркэ түмүгүнэн, 4 холуобунай дьыала көбүтүлүннэ: икки дьыаланы – Орто Халыма улууһугар, биирдии дьыаланы – Томпо уонна Өлүөхүмэ улуустарыгар”, - диэн иһитиннэриигэ этиллэр.
Уопсайа муус устар 24 күнүттэн балаҕан ыйын 27 күнүгэр 2663 патруллуур эриэйдэ дьаһаллара ыытыллыбыттар. Баһаар сезона саҕаланыаҕыттан өрөспүүбүлүкэҕэ нэһилиэнньэ ойуурга киириитин бохсор 377 пост турбут, онно 10361 киһиэхэ ойуурга киирэллэригэр аккааһы биэрбиттэр. Маны таһынан, ойуурга баһаар суоһаабатын быраабылатын кэһиигэ 251 административнай боротокуол бэриллибит, 197 административнай накаастабылы биэрэр туһунан быһаарыы ылыныллыбыт.
