Саха сиригэр тайахха, кыыл табаҕа, тыатааҕыга, бөрөҕө уонна андаатырга булт болдьоҕун уларытары былаанныыллар. Бу туһунан Ил Дархан уонна бырабыыталыстыба дьаһалтатын пресс- сулууспата иһитиннэрэр.
Маны таһынан, хотоҕойдоох көтөргө, атыыр куска, андыга сааланыы болдьоҕун эмиэ уларытаары гыналлар. 2021 сыл тохсунньу 1 күнүттэн Арассыыйаҕа булт саҥа быраабылалара киирэллэр. Инньэ гынан Ил Дархан “Об определении видов разрешенной охоты и параметров осуществления охоты в охотничьих угодьях Якутии” диэн ыйааҕа тахсан турар. Булт болдьоҕун көһөрөр туһунан этиилэри бырабыыталыстыба иһинэн булт уонна бултуур сирдэр Сэбиэттэрин мунньаҕар эппиттэр. Экология миниистирин солбуйааччы Николай Додохов иһитиннэрбитинэн, саҥа булт быраабылатынан, кыыл-сүөл ахсаанын бэрээдэктиир сыаллаах, куобахха, атыыр көтөрдөргө уонна бөрөҕө туһахтыыр көҥүллэммит. Саҥа бырайыакка ханнык улуустарга хайдах туһах көрүҥүн туһаныахха сөбүн киллэрбиттэр. Маны таһынан хараҥа бириэмэҕэ туйахтаах кыыллары, тыатааҕыны уонна түүлээххэ бултуурга тепловизордары, сырдатар тэриллэри туһаныыны хааччахтаары гыналлар. Бастакы зампред Алексей Колодезников сэтинньи ый бүтүөр дылы экология министиэристибэтэ булт болдьоҕор улуустар этиилэрин хомуйан баран Сэбиэт мунньаҕар этэригэр сорудахтаабыт.
